IMILAYO KAJEHOVA
Uvuka njani mlaleli? Lamhla
uloBarbara Nkala, ngisithi asike sikhangele Imilayo kaJehova uNkulunkulu.
Mina ngizalwa koMoyo, njalo
ngikhulele khona. Kwakulemithetho esayifundiswa ngabazali; okuhle okufanele
sikwenze sikuphile, lokubi okwakungafanelanga kwenzakale loba kuzwakale koMoyo.
Sasikwazi ukuthi kufanele siyilandele leyo mithetho ngoba iyasivikela kokubi
siphunyuke lemijibileni ethile. Babethokoza abazali nxa silandela leyo
mithetho, badane kakhulu lapho omunye wethu ethe wephula leyo mithetho.
Owephula leyo mithetho wayejeziswa.
Nginkeme umlomo kuviki
elidlulileyo ngixoxa lomunye umbalisi owaphetsheya eMelika. Wayebubula ebabaza
ngokuthi abatsha abayazi imilayo kaNkulunkulu. Wayesithi okumzwisa ubuhlungu
kakhulu yikuthi, lalabo abavela emzini yamaKhristu, abathi bangabalandeli
bakaJesu, labo bayayixhamanda bacine benwaya amakhanda lezilevu. Wathi, omunye
umkhula wakhe wake wabuza ekilasini ethile kwelinye ikolitshi elaziwayo ukuthi
bangaki abangaqamba imithetho elitshumi. Uthi abambalwa abafundi baqamba
emibili, emine, kodwa ikilasi yonke yehluleka ukubalisa yonke imilayo kaJehova
elitshumi.
Wena-ke mlaleli, wazi
emingaki? Uyayazi yonke na imithetho elitshumi? Mzali, uyabafundisa na
abantwabakho imilayo le? Bayayizwisisa na? Ake siyibale sisonke imithetho le.
Itholakala ku-Eksodusi 20:1-17. UJehova ngokwakhe wayiloba ukuze uMosi
ayifundise abako-Israyeli. Kodwa njengoba lathi silandela ukholo lunye,
sikholwa uNkulnkulu munye, kumele siyilandele.
1. Ungabi labanye oNkulunkulu
ngaphandle kwami.
2. Ungazenzeli izithombe
ezifana lezinto ezisezulwini kumbe phansi emhlabeni, njalo ungazikhothameli,
ungazikhonzi.
3. Ungaliphathi ngeze iGama
likaJehova uNkulunkulu wakho.
4. Khumbula usuku lweSabatha
ulugcine lungcwele.
5. Klonipha uyihlo lonyoko
ukuze impilo yakho ibende elizweni akunika lona uJehova.
6. Ungabulali.
7. Ungafebi.
8. Ungebi.
9. Ungafakazi amanga
ngomakhelwana wakho.
10. Ungahawukeli indlu
kamakhelwana wakho, loba yini ekamakhelwana wakho.
Ibe imingaki imiyalo
obe ukade uyazi ungayixhamandi? Nxa uyazi yonke wenza kahle. LoJehova
uyathokoza ngawe. Nxa ungayazi, vula iBhayibhili lakho eThestamenteni EliDala,
ku-Eksodusi 20, uyifunde njalo uyizwisise. Cela uMfundisi wakho akuchazele
uzwisise.
Ikanti-ke, ayisiyo
yodwa imilayo kaJehova le. Ukhona oyiwo uMlayo Omkhulu eThestamenteni eliTsha
oyiwo oqakatheke okwedlula yonke le. Utholakala oGwalweni lukaLukha 10:27. Uthi
wona, “Thanda iNkosi uNkulunkulu wakho ngenhliziyo yakho yonke,
langomphefumulo wakho wonke, langamandla akho wonke, njalo langengqondo yakho
yonke.” Njalo, “Thanda umakhelwana wakho njengoba uzithanda wena.”Abako-Israyeli bavele bawufundiswa kadekade eThestamenteni Elidala oGwalweni
lukaDutheronomu. Kwathiwa abawufundise abantwababo.
Kambe nxa simthanda
uNkulunkulu ngaleyo ndlela, singamonela na? Phela, umuntu esimthandayo asifisi
ukwenza izinto ezingamdanisa. Sifisa ukumthokozisa njalonje. Nxa umthanda
omunye umuntu, ungamenzela umona na? Awungeke. Mlaleli, funda uyazi yonke
imilayo kaJehova ukuze uphile kuhle.
Asithandaze: Moya oyiNgcwele,
wena ongikhokhelayo njalonje, ngisiza ungiqinise ngimthande uJehova ngakho
konke okwami engiyikho khona, ngithande lomakhelwana. Amen.
Barbara Nkala, 2019
No comments:
Post a Comment