Gogo Nkala Newsletter 3/2020

Gogo Nkala Newsletter 3/2020

Ngiyabingelela Mthwakaz’ omuhle! Hawu, sengimangele ngoba insuku zigijima ngesiqubu esingummangaliso. Uyananzelela nje ukuthi sesiphakathi kwenyanga esungula umnyaka, uZibandlela?

Usubophe migomo bani? Uyalidla na ilizwi eliphilisayo insuku zonke kumbe iBhayibhili lakho uzalithintitha uthuli ngesonto ususiya enkonzweni? Usedolweni na ngomthandazo? Bal’ inhlanhla lezibusiso zempilo ubonge. UNkulunkulu uthembisile ukuthi nxa sicela ngokwentando yakhe langomoya ocolekileyo uzasizwa aphendule. Silokhu silangazelela izulu. Siyawaswela amanzi ngoba ayimpilo kithi. Izifuyo ziyawaswela amadlelo lamanzi. Abakhokheli bethu bayakuswela ukukhokhelwa ngenhlakanipho Yalo oWazikonke, oBonakonke, oLamandla onke njalo oSendaweni yonke. Asikhulekeni singadinwa.

Zivuliwe izikolo. Asibaceleleni abantwana bethu baphitshekele imfundo. Asibaceleleni lababalisi baphiwe imfanelo yabo. Yibo abavula izingqondo zosapho lwethu, abakhokheli bakusasa. Asiceleni eNkosini ihlomulele uhulumende ngamasu enhlakanipho lolwazi ukudala imisebenzi emitsha abantu basizakale. Asidonseni kanyekanye Mthwakazi!

SIXOXA NGENGXAKI ZABATSHA

Kuviki elidlulileyo besiphezu kwengxaki ephathelene lokuqakatheka kokuzazi ukuthi umuntu ungubani. Kuleli iviki sixoxa ngabangane. Umngane angakuphakamisa akwakhe loba akubhidlizele phansi. Kanti umngane oqotho ngonjani? Konke esingakho lamhlanje; izinkondlo, loMusa Wansuku Zonke, kukhangele ubungane obuqotho.

Munt’ omutsha, ngilabo lamhlanje osowenu abazaxoxa ngabangane. Kodwa wena uthini? Siyafisa ukuzwa eyakho imibono. Lakini bazali labadala, siyayicela eyenu imibono liseluleke, isizakale intsha yethu.

GIYA MTHWAKAZI

Lamhla silezimbongi ezimbili eziphezu kwendaba yobungane labangane. Silayo imbongi endala uZingizwanizinja, okaSiqhoza kunye lembongi yethu ethuthukayo, uNokubonga Mpofu. Ake sizwe ukuthi bona bathini. Sithemba lawe uzakhuthazeka ulobe eyakho inkondlo uyithumele sigiye sonke kulesi sigcawu.

Sithembile Siqhoza

AWU, KODWA MNGANE!

Besingamathe lolimi

Singasibomndeni munye

Sihlanganiswa yizenzo

Ngokwelulekana kuhle

Umsebenzi sibambisana.

Akubuyelwa nganxanye kungemanzi,

Besiphikisana kutsh' uthuli

Sidaz’ inkani size sivumelane

Ngoba besizwana sizwelana.

Usizi lenhlupheko kimi

Kuzwiwa kwaziwe nguwe kuqala

Kubonwa nguwe futhi

Ubusungiqinisa.

Ma ngingalali

Nguw' obungimis' isibindi.

Nxa ngisedakeni,

Ubusakh' iqhinga lokungikhupha,

Ubulihlombe  lami lokweyama

Bengingeke ngilale ngendlala

Amathumb' am' atshay' imvokloklo

Wen’ukhona mngane.

Bengingeke!

Ubuyigcin' imfihlo yami

Langempazam' ungayisebenzisi njengesikhali,

Ubungaphahluki Sithulile

Namhla nje sengihlinzelw' ezibini

Mngan' ungijikele njengotshwala bujik' esiswini

Kant' ungumalum' ephozisa.

Uyitshay' emuva

Uyitshaye phambili

Ungixabanise lomkami

Usungixabanise labomakhelwane

Angilamuzi nje kungenxa yakho.

Usungene wanab' egumeni lami.

Kawusibeki phans’ isinqe

Ucela ngam' udle ngegama lami

Awu, kodwa mngane.

Bengikwethembile

Wakheth' ukungiphoxa, Mpehlane.

Awu, kodwa mngane

Ithemba kalibulali

Lanxa beth’ isikhun' esisodw’ asivuthi

Babuye bath’ izandla ziyagezana,

Mina sengiyoba ngusimayedwa njengelanga.

Sithembile Siqhoza

Zingizwanizinja

Nokubonga Mpofu

UBUNGANE

Buyini ubungane?

Buvele buqale ngaphi?

Busungulwe ngubani?

Icandwe ngubani indlela yabo?

Buhlanganiswa yini?

Izakhamizi zidlelana ngokwazana

Lobungane

Abatsha bayaqomisana

Ngobungane

Izizwe zizwisisana ngcono

Ngobungane

Abantu bahlala labangane bethuthukisana

Ubungane buhlanganiswa ngokuhle

Lokubi

Ubungane buhle buyimvelo

Yibo obusakhayo

Njalo obusiqinisayo ebunzimeni.

Mngane, butshoni ubungane kuwe?

Ukutshayelwa ucingo njalonje?

Ukubhalelana izincwadi?

Ukusebenza ndawonye?

Ukuphila ndawonye?

Ubungane obudingekayo ngobunjani?

Yikukhathazeka nxa ngikhathazekile

Ukutshelana amaqiniso

Ukwethembeka kukho konke esikwenzayo

Bengithi ngithembe wena

Bengithi ulihawu lami

Kanti ngingazi ngizigwaza ngowami

Umkhonto

Ngiziqhenya ngawe mngane

Kanti indlela iyaphela utshani

Ukungazi kufana lokufa

Abantu kade besazi silibhulugwe lebhanti

Namhlanje ngilenhloni

Ngoba sengiphenduke inhlekisa

Emphakathini

Ekhwapheni lami bengikufakile

Mngane wami

Ube ungunconyiwe, ngingakuthontisi

Imfihlo lobuyimi bengikuthululela wena

Bengincweba wena indlebe

Namhlanje ibizo lami liyingoma emlonyeni wakho

Namhlanje libhemisana ngami linathisane ngami

Bengithi ungumgane oqotho

Lutho.

Ube ungimunya umungula kuphela.

Okomuhlwa esigodweni nama kimi

Kanti uqonde ukungitshiya ngilugebhezi

Ginqi gonqo, uyaphendulela impilo

Mfowethu, Dadewethu

Qaphela abangane ophila labo

Ngabe ngabangane abaqotho yini?

Mhlawumbe zimpisi eziphangayo

Ezizembathise ezemvu izikhumba

Nanzelela bangakutshayi ngemfe iphindiwe

Ubungane olabo buyakha loba buyabhidliza

Buthelelela uthando loba inzondo?

Buyahlanganisa loba buyahaza?

Buyapholisa loba buyalimaza?

Buyini ubungane kuwe?

Ziqhenye ube ngumngane oqotho

Onambithekayo

Umusa lothando kutholalakale kuwe.

Nokubonga Mpofu

UMUSA WANSUKU ZONKE

Umngane Oqotho

Umngane oqotho ulivelakanci njengelihlo lentwala. Banengi abangakuvezela izinyo, kodwa inhliziyo ingakubobothekeli. Banengi abangahamba lawe kukuhle, kodwa impilo ingaba munyu batshona phansi njengomswenya. Banengi abacupha mganu munye lawe, kodwa bakugece emhlane. Laba abasibangane abaqotho. Ngomaluma bephozisa. Zinyoka. Baqaphele.

ENcwadini eNgcwele, kulabangane ababili abayisibonelo esihle sobungane obuqotho. NguDavida, owacina eyinkosi yakoJuda, ukhokho kaJesu; loJonathani, indodana yenkosi uSawuli. Ngemva kokuba uDavida esebulele uGoliyathi, inkosi uSawuli yamthatha yahlala laye. Kulapho ahlangana lendodana yenkosi, uJonathani. INcwadi isitshela ukuba, “… inhliziyo kaJonathani yanamathela kwekaDavida; uJonathani wamthanda njengokuba ezithanda yena … UJonathani wasesenza isivumelwani loDavida ngoba wayesemthanda njengoba ezithanda yena. UJonathani wakhumula isigqoko ayesigqokile, wasinika uDavida, wamnika lebhatshi lakhe, kanye lomhedla wakhe lomtshoko wakhe lebhanti lakhe. UDavida waphuma, waphumelela kuzo zonke indawo lapho uSawuli amthuma khona …” 1 uSamuweli 18:1b – 5a.

UJonathani wapha uDavida izigqoko zakhe zobukhosi. Izingcitshi ekucubunguleni imibhalo zilinganisa ukuthi lokhu kwakukhomba ukuthi wakwazi ukuba uDavida nguye owayezathatha ubukhosi bukayise. Ukuphumelela kukaDavida kwadala umhawu omubi lenzondo embi kakhulu kuSawuli. Umoya omubi wamhlala amadundulu, waze wafuna ukubulala uDavida. Loba kunjalo, uJonathani wabambelela kumngane wakhe, wathembeka, wamsindisa ekubulaweni nguSawuli. Sibona inkosi uSawuli ethuka indodana yakhe ngothando lwakhe kuDavida aze azame lokuyibulala. (1 Samuweli 20:33). Lokho kwaqinisa uthando lukaJonathani kuDavida, wathukuthela njalo eyangiswa yisenzo sikayise kuDavida, wazila ukudla esosizini olukhulu.

Yibungane obuqotho lobu. UJonathani esefile uDavida wamlilela kakhulukazi  kunye loyise. Waze wadala ingoma ebaphakamisa ngobuqhawe babo, wathi ngoJonathani, “Ngidabukile ngawe, mfowethu Jonathani; ubulungile kakhulu kimi; belumangalisa uthando lwakho, lusedlula uthando engithanda ngalo isifazana” 2 Samuweli 1:26.

Umngane oqotho ulothando, uyakusiza, ulakho lokuzinikela akufele. Wayenjalo uJonathani kuDavida. Ikanti uDavida eseyinkosi, kamlibalanga umngane wakhe. Wadinga waze wazuza indodana kaJonathani wadla layo ethebulini.

Wena ulaye umngane oqotho kanje? Ukhona ongumngane oqotho kithi sonke, owakhetha ukuzinikela ukusifela. NguJesu Khristu. Uyamazi na? Mazi, umkholwe, umfakaze, ube lempilo engunaphakade.

Barbara Nkala 15 January 2020

***

Okwalamhla kwanele Mthwakaz’ omuhle! Siyafisa ukuzwa kuwe ukuthi isigcawu lesi sikuthinta ngandlela bani. Siyafisa njalo ukuzwa ukuthi eyakho imibono ithini ngoba ulawo umcabango ongasisiza ngawo. Siyanxusa. Asibeni selimeni lokukhuthaza lokuphakamisa ulimi lwethu. Hlaba eyakho indima ngo2020 uyiphutshe.

Ukhumbule phela ukuthi esalela muva ithiwa xhaka yizinja.

Ngiyalithanda, njalo ngiyabonga!

Gogo Nkala

Gogo Nkala Newsletter 2/2020

Silokhu sinambitha ukuvunyelwa ukungena ku2020 Mthwakazi. Haleluya! Sesibonga labethu abebephumile bavakatsha bayahlanganyela lababo ezindaweni ezahlukileyo, abahambe baphenduka bephilile. Siyadumisa.

Banengi abethu abaphakathi kwemithandazo umnyaka uqala nje bethandazela okwehlukeneyo. Awungapheleli kuyole inyanga umkhuleko. Awube yimpilo yansuku zonke ngoba ukhona olawula izimpilo zethu, okufanele sikhulumisane laye izinsuku zonke, sikhonza, sibonga, sicela, simi egebeni. Banengi njalo abaphanyeka kuye imibono yabo ngelizayo, kunye lemigomo abalayo. Asibongeni, sibike, sicele kuye oPhezukonke!

SIXOXA NGENGXAKI ZABATSHA

Lamhla siphezu kwengxaki ephathelene lokuqakatheka kokuzazi ukuthi umuntu ungubani. Kwesinye isikhathi abatsha bayahamba balahleke ngoba bengazazi ukuthi bangobani. Basuke baphonguthathwa ludumo nje, bazithole sebephakathi kwezingxaki thize behluleke lokuzixakulula. 

Munt’ omutsha, ngilabo lamhlanje osowenu abazaxoxa ngokuzazi uqobo. Kodwa wena uthini? Siyafisa ukuzwa eyakho imibono. Lakini bazali labadala, siyayicela eyenu imibono liseluleke, isizakale intsha yethu.

GIYA MTHWAKAZI

Silayo imbongi yethu uMartin Mlilo oza lezinkondlo ezimbili. Kweyokuqala uhaya umnyaka omutsha; ikanti kweyesibili uyakhala, esola njalo elimukisa ngokunye akubonayo empilweni. Ake sizwe ukuthi uthini. Wena uthini ngezinkondlo zikaMlilo?

Martin Mlilo

UMNYAKA OMUSHA

Wagiy’ uMthwakazi

Enkundleni zokuzijubulisa

Kwadum’ ihlomb’ elikhulu

Wangumdlodlom’ udladlazela

Sijabulel’ umnyak’ omutsha

Ngumakoti lo wembethe

Ngimembes’ isiyantubane

Emnyaken’ omusha

Sakhohlw’ izinhlungu zomdala

Sathi sala kahle lenkemenkeme zakho

Namhlanje sizadla sincinde

Ukudla kuthe dlangalala

Zitike uvungul’ ubong’ oPhezulu

Yinhlanhla yamaSwazi le

Ukungen’emnyakeni omutsha

Ujabule uMthwakazi

Ugiy’ ancinte ifefe

Ngumthimba wamangabuzane emkhathini

Yintokozo yodwa

Siqolotsha njengamathol’ ebona unina

Yebo ngiyavuma Bhoqo

Impilo ibiphisela ngemcibitsholo evuthayo

Siwugqibil’ omdala silemnvinvinya

Ubusivivinya sigcwele invundela

Kodwa sibong’ isandla soPhezulu.

Wasisingatha

Wasiqhuba sambon’ u2020

Umnyaka omutsha

Olethemba, lezibusiso lamathamsanqa.

Martin Mlilo

YEKA UKUTHENGISA UMZIMBA

Martin Mlilo

Litshatshaz’ isinqandamathe lesi

Ubunjiwe muhle ulolongekile

Ukhalo ngoluka lonyovu,

Izinqe lihlabusi

Kodwa wakheth’ ukheth’ olubi

Waphil’ impil’ engcolileyo

Ngamahlanzo la

Wathengis’ umzimb’ uzingel’ amasolombane

Akusiyon’ impilo le

Ngamahlaya nje.

Bazibiza amabhlesa

Bakuyenga ngemali

Lawe wathatheka wanguthathekile

Bazakutshwabhanis’ utshwabhane

Ufane lesikhumba sengcuba

Uzoqothuk’ inwel’ ekhanda

Ufane lomgakl’ olesikhwekhwe

Wakheth’ ukukheth’ okubi

Uselusan’ olunuk’ uchago nje

Mus’ ukuthengis’ umzimba bo!

Wayihamb’ imcimbi yebusuk’ engcolileyo

Abakuthandi labobantu

Wake walubonaph’ uthando lwebusuku

Emini selibhekana ngawengulube

Bakubiz’ itshatshazi,

Amakhwel’ akhala nxazonke

Zinkanku lezi

Kodwa uzitshil’ ube ngumhogoyi,

Ngabafana laba, howu

Ngibafanisa lezinja

Zon’ ezigxozel’ ithamb’ elilomnkantsho

Indenda yeyi wena!

Sithuthandini, hlaluka bo!

Hlakanipha njengephimpi

Ubemnene njengejuba

Mus’ ukuba libele lendlela

Lon’ elizovuthwa mhla kuthwas’ inyelele

Kuw’ inkanyez’ engakaz’ ibonwe.

Yek’ ukuthengis’ umzimba

Ulithempeli, iyakutsho iNcwad’ eNgcwele

Ziyakukhuz’ impung’ esezihamba ngezintathu

Ngumakad’ ebona, madala lamehlo

Wena wasiqoqodo waqinis’ ikhanda

Njengesikhwehl’ esigijim’ ensimin’ esanda kulinywa

Uzakhwehlela njengomkhongol’ odl’ iskhumba sikababhemi

Yingculaza le,

Izakukhukhuz’ ube ngucigo

Uzembel’ igod’ usaphila

Yek’ ukuthengis’ umzimba

Bakuthengel’ okudakayo

Bakuhotshis’ izidakamizwa

Awuboni ngani ukuthi zimpis’eziphangayo

Zifun’ ukukukhukhuz’ usal’ umathambothambo

Hlonipha umhlaba bo!

Umhlab’uyahlaba

Umhlab’ uyazombazomba

Wena kodwa hamb’uqonde njengosolobhoni

Yek’ ukuthengis’ umzimba

Akuyon’ into yokuthengiswa le

Lihlazo leli bo!

Mus’ ukuba yisithutha

Uz’udle amahlwil’ omkhaza

Osowenu bafundile baqoqod’ imitshina

Yiyo indlela yokuding’ imali le

Hayi ukuba libele lendlela

Khuzani babalisi emakolitshini

Intsh’ idlala ngegeja kuziliwe

Lawe Mfundis’ esontweni

Khwica bo!

Akusimpi kamongikazi yedwa le

Khuzani amabel’ endlela

Yekan’ ukuthengis’ imizimba!

Martin Mlilo

UMUSA WANSUKU ZONKE

Khangelani, Ngenza Okutsha

Umnyaka lo odluleyo ku-2019, awubanga muhle. Ube ungumnyaka wendlala. Alinanga okusuthisayo izulu nyakenye. Akubanga lesivuno esingagcina abantu. Indawana yonke nje emzansi Afrika akubanga kuhle. Ezinye izindawo zibe lugwadule olwesabekayo oluleminkenke ezwisa ubuhlungu. Bekubonakala lezifuyo ezahamba zicuba ezindaweni.

Esahlukweni samatshumi amane lantathu ogwalweni loMphrofethi u-Isaya, sibona uNkulunkulu womusa lesihawu esebazwela abantu bakhe loba babeke bahamba ngezabo izindlela bamdela. Kodwa yena kabadelanga. Sibona-ke ethembisa ukuba labo kubo bonke ubunzima abadlula kubo. Uthembisa ukubahlenga lapho babethunjwe khona. Sibona umphrofethi u-Isaya esebakhumbuza abako-Israyeli ukuthi uJehova owavulela okhokho babo uLwandle oLubomvu bachapha emhlabathini owomileyo uzabasiza njalo. Uthembisa ukubasindisa. Uthi, “Khohlwani izinto zamandulo, linganakani ngosekwedlulayo. Khangelani, ngenza okutsha! Khathesi kuyavela ngokuphangisa; kalikuboni na? Ngenza indlela enkangala lezifula ogwaduleni” (u-Isaya 43:18, 19).

UNkulunkulu wayesebakhupha ebugqilini beBhabhiloni abako-Israyeli. Basebebuyela kibo ko-Israyeli. Ake sizifake esimeni sabo sithi lathi sesichaphe kuhlupho luka2019. Sesingene komutsha umnyaka oka2020. Loba singazi okukhona phambili kwelakusasa, siyamazi njalo siyamlalela lo ophethe konke ezandleni zakhe. Asifisi ukuhlalela ovalweni sisesaba okwanyakenye. Asifisi ukugxila kunhlupho zamandulo. Sifisa ukukhohlwa ngazo. UnguNkulunkulu owenza izinto ezimangalisayo ezingajwayelekanga. Wazenza emandulo. Uyenelisa ukuzenza lalamhlanje. 

Abako-Israyeli wabadalela indlela enkangala. Wabapha amanzi aphuma edwaleni. Wabalonda bedabula enkangala. Wabalonda besebugqilini eBhabhiloni. Kuyini okungamehlula ukuthi asilonde lathi? Ubelathi kulolonke uhlupho lwanyakenye. Sesikutshiyile okwanyakenye. Sesingena kokutsha. Siwuqala lo unyaka ka2020, ulathi. Kasidelanga. Izithembiso zakhe zingu “Yebo lo-Ameni!” Uyasidalela indlela phakathi kwezinhlupho esidabula kuzo. Lokho akwenza emandulo, uyenelisa ukukwenza njalo. UnguNkulunkulu omi njalo, ongaguqukiyo.

Labo abaphila kuNkulunkulu abasweli ukwesaba loba yinkinga bani engabe ibhekane labo. Uthi loba sidabula phakathi kwamanzi asiyikugalula. Loba sidabula phakathi kwamalangabi omlilo, uthi asiyikutsha. Yizithembiso eziswela ukholo. Siphila ngethemba. Asimthembeni simkholwe yena othi, “Khangelani, Ngenza Okutsha!”

Barbara Nkala  January 2020

***

Kwanele okwalamhla Mthwakaz’ omuhle! Siyafisa ukudonsa kanye lawe. Ake usithinte usazise eyakho imibono lemicabango. Ngiyanxusa. Asibeni selimeni lokukhuthaza lokuphakamisa ulimi lwethu. Hlaba eyakho indima ngo2020 uyiphutshe.

Ukhumbule phela ukuthi esalela muva ithiwa xhaka yizinja.

Ngiyalithanda, njalo ngiyabonga!