Gogo Nkala Newsletter 4/2020

Passmore Ndlovu

LAPHELA ISIKO

Yeyeniiiii bo!

Safa saphel’ isizwe sabomkhulu

Labokhokho bethu

Ngabe yikho na esakufundiswayo?

Ziphi izalukazi ngizwe ngempululu?

Aphi amajaha ngizwe ngevokloklo?

Ziph’ intombi-nto emkhosini womhlanga?

Mayeee, laphel’ isiko!

Kambe bazakubakhona na omama bolweSine?

Zizabakhona na izinduna labosobhuku?

Enjelele kusahanjwa na?

Mayeee, laphel’ isiko!

Nguban’ ophisele olwethendele?

Kuntsha yanamhlanje?

Ebutsheni bam’ indlela ibibuzwa kwabaphambili

Kodwa lamhl’ abaphambili babuz’ indlel’ entsheni

Mayeee, laphel’ isiko.

Kungani lingasaboniswa?

Kungani lingavumi ma liphambanisile?

Kungani lingazehlisi lixolise?

Kungani lingasabongi ebadaleni?

Sokumele kubongwe lina, mayeee!

Ngilizwela usizi

Ngidabukile, ngidinekile, ngicunukile

Ngizonde ngigan’ unwabu.

Ngani bantwabethu;

Kodwa-ke, elomzali aliweli phansi.

Owathi amakholwa kawalahle isintu ngubani?

Owathi intsha yiyo esisazi ngcono ngubani?

Mayeee, laphel’ isiko

Thiyani ngazo zombili bantwabethu

Akelikhuzwe lizwe

Inhlonipho ngeyamahala

Njalo ayiyelwa esikolo.

Njalo nje elomzali kaliweli phansi.

Passmore Ndlovu

SIXOXA NGENGXAKI ZABATSHA

Ekuhle Mthwakaz’ omuhle! Lamhlanje ngihle ngavula ngenkondlo kaPassmore Ndlovu ukuze yandulele uhlelo lwengxoxo yengxaki zabatsha. UPassmore Ndlovu ngomunye wembongi ezintsha kulesisigcawu. Njalo lamhla ngilethe ezine ukuthi likholise ubuciko bezimbongi lezi zigiya phambi kwenu. Singakakhangeli ezilandelayo, ake singene kuhlelo lwengxaki zabatsha. Lamhla sikhukhuza indaba yezinto okufanele abatsha baqaphele ukuhugekela kuzo, bazilimuke. Lalela-ke ingxoxo yalamhla.

GIYA MTHWAKAZI

Mthwakaz’ omuhle ngiyabonga labo abamemethekisa bachela isinxuso sami indawana yonke. Zizwile imbongi ezintsha zasabela. Ziyathuluka inkondlo. Kagiye uMthwakazi.

Ngithanda ukwazisa lezizimbongi ezintsha ukuba, ngiqoqa iqoqo elitsha lezinkondlo engithemba zizaphuma ogwalweni olutsha lwezinkondlo unyaka ka2020 ungakagoqi. Zonke inkondlo engizamukelayo zizangena kuqoqo elitsha njalo inye ngayinye umniniyo uzathola isibongo esifaneleyo. Lezizinkondlo kufanele zibe ngezintsha ezingakaze zidindwe. Ezimbalwa zizangena kulesi sigcawu ukukhuthaza abanye abalogqozi oluvilaphayo. Inye ngayinye engena kulesisigcawu ihle ivune ingxenye enkulu yesibongo.

Njengobana ngitshilo, lamhla silembongi ezine ezintsha kulesisigcawu. Ake ubale ukholise ukujula komqondo lobuciko bolimi, unambithe. Asiziqhenyeni bo ngembongi zethu lezi eziphakamisa ulimi lwethu, ikanti njalo zisilola ukuba kesijulise imicabango ngempilo le esiyiphilayo.

Onesimo Ngcotsha

KWAKUNGENJE

Inyanga yayiceca ngomkhumbi

Izalukazi zishab' umkumbi,

Lin' inyang' iz' iyekufa

Zigcwale zize ziphuphum' iziphala

Sivuke siholel' inkukhu nsuku zonke

Lazo zidobhe zize zidinwe

Lezo nsuku seziyinkumbulo nje.

Mkhumbi ban' ongesimkhumbi?

Mkhumbi ban' othwel' indlala?

Mkhumbi ban' oquketh' umoy' otshiy' isinyay' emakhaleni?

Mkhumbi ban' opheth' eliphelel' emafini?

Mkhumbi ban' otshis' uhaqaz' ihwanqa?

Mkhumbi ban' owendlal' indlal' enkundleni?

Bayibabaze lasemaphandleni.

Inkanyezi zawenyany' umkhumbi

Zakheth' ukuhambela kude,

Ilanga lalangazelel' ukuhamba lodwa

Inyanga yanyakaza phakathi kwawo yaze yafa.

Zingaze zicube ngemihlan' iminyaka

Ziyabe sezilala phezu kwamankonyane.

Ekweluseni sisidl’ idolonkonyana

Angikhulumi ngelihlo lenkomo

Sitshona sisuth' izadenda

Eziziben' ekhal' ungqetshu.

Namhlanj' abafana sebeguliswa ngaqandayo

Angatshon' engadlang' uyakumangalel' usal' umangele

Umangaliswe yisimanga salokh’ okumangalisayo.

Selisina ligcwigcwiza

Sekulinywa ngembolisamahlanga

Kukhanzingw' amabele

Kayisosiw' ingqwaqwa, singeyokugayiswa

Inkukhu kazisathokoziswa ngamathuku

Sezivalelwa ziholelw' ilanga selisenkanda

Kwakungenje!

Iziphala zibeth' umoya

Ovuniley' ulomgobh' othelel' ebusuku

Ozaciley' ulomoy' omubi

Okhulupheley' udla kakhulu

Ongelamazinyo ngodl' inyama yomuntu

Insingizi sezifuywa

Inkanku sezisosiwa

Empeleni kwakunganje.

Onesimo Ngcotsha Mpofu

Lubelihle Moyo

NGUBANI OWAYESAZI?

Nguban’ owayesazi?

Kamb’ ukhona lapha yini?

Ongathi mina ngavele ngabona

Kudala babethi imfund’ ivul’ amasang’ empumelelo

Lamhla sebethi bek’ ecelen’ imfundo yakh’ uziphandele

Bath’ imfund’ izasebenza laph’ amathub’ evulekile

Ngempel’ izinto ziyajika.

Nguban’ owayesazi?

Ngokuth’ abantu bazavukisana

Batshonisane ngomumo welizwe?

Endleleni bahlangana bakhulumisane ngawo;

Izolo inkomo bezidlan’ uboya

Abatu bekhomba ngophakathi

Lamhla ziphelile zicuba’ inkomo zabantu

Sekudliw’ imbuya ngoluthi.

Nguban’ owayesazi?

Ukuth’ izikhathi zokulima zizaguquka

Nanko phel’ isikhathi sokulima sifikile

Kodwa izulu nkwe!

Ekadeni besidlal’ iKhisimusi

Sesiqale sayahlakul’ emasimini

Lonyaka asikubonanga lokho

Balimil’ abenkosi, kodwa kwatsha qhu

Maye! Ngenhlanyel’ ebolele phansi

Ikanti ivel’ isibiz’ izigidigidi.

Nguban’ owayesazi?

Ukuthi sizabuyela kuleziya nsuku

Laph’ isinkw’ ebesimofuzwa ngabalemali

Lamhlanje ukusithola kuleth’ injabulo ebantwaneni

Inyama yon’ angikhulumi

Odla yon’ ulala ngesibomvu

Ukudla pham’ ezitolo

Kodw’ ethengayo nkwe

Kuntel’ abalezihlobo ngaphandle kwelizwe

Zijikil’ izinto lonyaka

Nguban’ owayesazi?

Ekaden’ iqhude beliphandel’ isikhukhukazi

Isikhukhukazi besinakekel’ amatsiyane

Bekudliwa kuncindw’ iminwe laph’ ekhaya

Abantwana bebejabul’ uBab’ esiz’ ekhaya

Lamhl’ akubonwa lokho

Elilamehlo liyaziphandela.

Nguban’ owayesazi

Ukuthi umhlab’ utshay’ ugenqu

Zonk’ izinto zimi manzonzo

Akuselul’ ukuthol’ imisebenzi

Izolo lokhu, isithupha semfundo

Besimkhulumel’ umuntu

Lamhla konke yimvela kanci okwelihlo lentwala

Umsbenzi usutholwa ngezipha

Maye kulowo ofana lami

Kambe ngubani owayesazi?

Lubelihle Moyo

Sogcinwa Nkala

INDLU YOGAGU

Lisicuyile simile igumalala

Izithelo zas’ ezinambithekayo zaphenduk’ inofi

Saguquka sayinto yokulahlwa, okomlahlabantu

Lenina latheza lisikhekheleza

Lathi, hlezi usilimazel’ inzalo, lamadod’ ethu

Igolide likazulu laphenduk’ isidak’ esitsha siqhezuke.

Angithi besisithi sakha ilizwe

Besingathi silwa lombuso womhlophe na?

Pho sekuthen’ imkhonto yethu sithintana ngempumulo?

Siyitholil’ inkululek’ isizwe,

Kodwa uzulu wasala emaketaneni

Laxexebulwa ilizwe,

Ladonselwana sasidwaba, sibangwa yimidlwane.

Lidonselwana nje kulimal’ uzulu.

Sophephelaphi thina?

Dlithiza madlithiza donsi lolonyovu oluluma kokuphela

Ukhonzile savula, kanti sizembela owethu.

Besithi sigcoba inkosi

Kanti sendlalel’ isitha sikaMatshobane

Bathi kukhalelw’ umenziwa,

Pho thina sobihlelwa ngubani

Ncinda uminze ngemiphefumulo yethu

Yith’ ababeki bakho.

Liphume lembeswe ngelimnyama ifu.

Saqhezuka isiphala sethu sihlahle awempukunyonyo

Umthombo wenkululeko wopha,

Wabhibhidla kwangani siqalekisiwe.

Pho besilolelan’ izikhali nxa sesigwazana sodwa?

Pho besilimelani nxa sesivun’ alempehlane?

Xola bo! sizwe esimnyama, siphelelani!

Besisithi sakha umbuso ngozibuse

Kanti sakha eyogagu ezasijuj’ imizwa ibebuthundu,

Sisithi sifulela ikusasa lethu

Kanti sifulela ngogagu, nanku sisephandle lamanje.

Sizibone umthwebebe sathi zehlisile, kanti cha!

Ngamachaphazi nje kuphela

Pho besilunyelwani,

Ngoba nanku sesibulawa luluju lwakhona?

Ngeqiniso indlu yogagu iyanethela.

Sogcinwa Nkala

KHETHA!

Kulengoma esasiyihlabela kudala ethi,

“Kheth’ eyakho, kheth’ eyakho,

Ngob’ indlela zimbili;

Enye iya ekufeni

Enye iy’ ekuphileni.”

Khetha! Empilweni esiyiphilayo sihlezi singabakhethayo. Sikhetha okuhle, loba okubi. Sikhetha okungasisiza loba okungasilimaza. Kakho umuntu okhetha okubi loba okulimazayo ebona. Ukukhetha kuswela inhlakanipho lokunanzelela. Yinhlakanipho ephiwa nguNkulunkulu hatshi eyomhlaba. Yinhlakanipho eyokulalela unembeza, hatshi eyokuphongubhudlukela nje.

ENcwadini, siyatshelwa ngabantwana bako-Israyeli bedela uNkulunkulu, bengasathembekanga, sebesenza ukuxhwala lokungcolileyo phambi kobuso bakhe. Ukuganga kwabo kwakungehlukanga kulokhu esikubona lamuhla. Labakhokheli babo abanjengabaphrofethi labaphristi basebeprhofetha amanga aluhlaza. Umhlaba wawusuwonakele. Sibona uNkulunkulu exwayisa isizwana sakoBhenjamini esithi sibalekele ulaka oluzayo. Uthi, “Manini emahlanganweni emigwaqo likhangele; libuze izindledlana ezindala, libuze lapho okulendlela enhle khona, lihambe ngayo, lizathola ukuphumula kwemiphefumulo yenu”uJeremiya 6:16. Kodwa abaxwayisekanga lula. Bakhetha ezabo izindlela.

Lathi asehlukanga kulaba. Kulochuku ezweni. Ilizwi leNkosi alisalandelwa. Abantu babhukutsha phakathi kwezenzo ezitshengisa ukuthi abamesabi uNkulunkulu. Kulokuzondana, ukweyisana, inkohliso, ukucindezelwa, ukungananzani, ubuhwaba lobugovu, ubuqili, ukuswela, lobunye ububi. Imbali yezolo iyaziphinda. Kodwa uNkulunkulu wesihawu uhlezi ekhuza njalonje.

UMosi, umkhokheli omkhulu eNcwadini elaya ayebakhokhela abantwana bako-Israyeli, esezadlula emhlabeni, uthi: “Lamhuhla nginxusa izulu lomhlaba ukuba ngofakazi bami ukumelana lani ngisithi sengimise phambi kwenu ukuphila loba ukufa, izibusiso leziqalekiso. Khathesi zikhetheleni ukuphila, ukuze kuthi lina kanye labantwabenu libe lokuphila kanye lokuthi limthande uJehova uNkulunkulu wenu, lilalele ilizwi lakhe, libambelele liqine kuye, ngoba uJehova uyikuphila kwenu …” uDutheronomi 30:19, 20. 

Wena-ke mhlobo wami? Ukhetha yiphi indlela? Ukhetha ukufa kumbe ukuphila? Umnyaka usaqala nje, khetha indlela ozayilandela ume kuyo, ungaphambuki. UJehova ukhona ukukusekela lokukuvikela. Khetha okupha impilo. Khetha izibusiso. Khetha ngenhlakanipho evela elizwini likaNkulunkulu.

Barbara Nkala    

January 2020

                                                                  ***

Asehlukane lapha Mthwakaz’ omuhle! Siyafisa ukuzwa kuwe ukuthi isigcawu lesi sikuthinta ngandlela bani. Siyalangatha ukuzwa ukuthi eyakho imibono ithini ngoba ulawo umcabango ongasisiza ngawo. Siyanxusa. Asibeni selimeni lokukhuthaza lokuphakamisa ulimi lwethu. Hlaba eyakho indima ngo2020 uyiphutshe.

Ukhumbule phela ukuthi esalela muva ithiwa xhaka yizinja.

Ngiyalithanda, njalo ngiyabonga!

Gogo Nkala