Gogo Nkala Newsletter No. 21

  Nokubonga Mpofu

Ekuhle Mthwakaz’ omuhle!

Mina ngimangele! Asazi wena. Sifike njani kulesisibanga? Sisungula umnyaka lo kuZibandlela kwakumnyamana ukuthi sizaluhamba njani loluhambo. Kodwa nanko, sesiwuthi phutshiyani umnyaka. OPhezukonke ulomusa. Uthembekile. Ngumgcini omkhulu. Usinakekele. Uhambe lathi ebunzimeni bendlela. Siyabonga!

Sicela enye yezimbongi kuviki elizayo ike iphungugiya Ngaye bo. Imhaye! Yethule zonke izibongo zakhe, ithokoze langokuzalwa kwakhe. Haleluya!

GIYA MBONGI KAMTHWAKAZI

Lamhla silayo imbongi esake sadibana layo ekupheleni kuka-Agasti lonyaka, uNokubonga Mpofu. Yena-ke uqome ukukhuluma ngayo imbongi. Akesizwe lokho asichathekela khona ngobunguye bembongi. Ikanti, wena uthini? Uvumelana laye loba hatshi?

 

Nokubonga Mpofu

IMBONGI

Abahayi bamabal’ abalobungcitshi

Ababumbi benkomo yomdaka

Abalondolozi bolimi

Babonga amakhos’ angaziwa

Amanye akhothama

Bababonge babateme

Njalo bancome

Imbong’ ihay’ engekho oyivumelayo

Amazwi ayo ajul’ enzikini yenhliziyo

Kanti yon’ ibongwa ngubani

Iyawabuth’ amabel’ achithekileyo

Ngobungcitshi bolimi

Imbong’ ivungula kuvele inguquko

Impucuko ivele isikhulumile

Phela yona ingumaguqula ngamazwi zwi

Nans’ isenz’ esitshwaqisayo

Lesisenzo sesithunuke sagubh’ ugqozi

Luvuke lwamis’ umhlonga

Lavuk’ idlozi lokubangula ameva

Lakhuluma lalaya kwazwakala

Imbong’ ilondoloza ulimi lwethu

Lenhloli zakithi zaphunguka

Ngobungcitshi bolimi sesivuselelwe

Bath’ esihle asidleli

Imbong’ ithi siyadlela

Isihambile sisala silokhu siphakela

Imbong’ isungul’ ikhankase ngolimi

Ulimi lwayo lunambitheka lugobhozise

Uginy’ amath’ uphinde

Imbong’ ingakhuluma

Indaba yay’ iba segudwini

Ibiya ngothango lwengqondo

Njengendlu eguduliweyo

Oyizway’ aphothule khona

Amazw’ ayo aludondolo

Amazw’ ayo mahle

Ayakhelana, abekwe kuhle

Sengathi ludwendwe lwezinyoni

Imbong’ iyaqumbaqumba

Iqumbaqumb’ imicabango yomuntu

Incwebuzel’ imizwa yabantu

Yebo phela

Iyahaya

Iyacula

Iyatema

Iyabonga

Iyayaxwayisa

Ifana lendosakusa

Ememezel’ ukusa

Ilidlabuzane eligidisayo

Leculo lenjabulo

Injengamayez’ aletha izulu

Ilizwe lomel’ ukutemeleza kwayo

Ngolim’ olugelezayo lunonisiwe

Yephuca ngobugabazi

Phakama mbongi kaMthwakazi!

Nokubonga Mpofu

NDEBELE NOVEL WRITING CONTEST

Lamhla ngibone kungcono ukuthi kesitshaye umphehlu mayelana lomncintiswano lo esiphezu kwawo. Ngithemba inengi selizama ukugoqa lokulolonga umsebenzi ukuze ubemuhle kakhulu. Labo abazabala bahlulele labo sebekhangelele ukuqala lowo msebenzi. Sikhangelele amanoveli amahle kakhulu azabalwa akholiswe ngamahlabezulu, njalo azaluphakamisa ulimi lukaMthwakazi.

    Nanzi njalo iziqondiso okumele uzinanzelele usaloba njalo ulolonga umsebenzi wakho. Ungehluleka ukuzilandela umsebenzi wakho awusoze ukhangelwe.

UMNCINTISWANO WOKULOBA INOVELI NGESINDEBELE

Mthwakazi omuhle, nanti ithuba lokuthi ulobe unonise isiphala solimi lwakho! Gagadlela lelithuba ubalelwe kulabo abaphehla ilifa lalamuhla lelakusasa.

• Loba inoveli ngesiNdebele esicacileyo
• Inoveli yakho kumele ibe lamabala ayi 30,000 loba edlulayo.
•  Zikhethele injongo ephathelene lalokhu okwenzakalayo empilweni. 
• Inoveli yakho ayibe ngumsebenzi ongakaze ukhutshwe ogwalweni oludindisiweyo ngaphambili. 
• Kumele inoveli yakho ibe ngumsebenzi othayitshiweyo, ulethwe ulugwalo oluqoqekileyo, amakhasi ecindezelwe ahlanganiswa kuhle. Gcina ikopi yogwalo lwakho loba usuthumele eyomncintiswano kuMhleli. 
• Kumele ikhasi linye ngalinye libe lenombolo, kusukela kusahluko sokuqala. 
• Kumele ikhasi lokuqala libe leBizo lakho, iKheli lakho, uCingo lwakho, lekheli le- Email nxa ulalo.
• Ilanga lokucina lokungenisa inoveli yakho nguLweSibili, mhlaka 31 Janawari, 2020. 
• Abaphumelelayo bazakwaziswa mhlaka30 kuMabasa 2020. Kuzakuba loMvuzo wokuqala owe US $250; owesibili oweUS$150; lowesithathu owe US$50 kungwalo ezizakhethwa. 
• Ologwalo oluphumelela ukudindwa uzakwaziswa kube lesivumelwano le Radiant ngalokho.

Nxa ususuthisekile ngogwalo lwakho, luthumele loba ululethe kula amakheli:

• KoBulawayo – KuMhleli, UMncintiswano Wokuloba INoveli, Radiant Publishing, C/o Telco, 114 George Silundika, Between 11 & 12 Avenue, BULAWAYO.
• EHarare – KuMhleli, UMncintiswano Wokuloba INoveli, Radiant Publishing, C/o 21 Armadale Road, Vainona, HARARE.
• Bana leqiniso ukuthi ugwalo lwakho lufikile kuMhleli ngokumthinta kunombolo ethi: +263 772231304. Yiyo njalo eye – WhatApp.

UMUSA WANSUKU ZONKE

Ungubani LoJesu?

Sesifikile njalo leso sikhathi. Ngelinye lamakhefu amakhulu emnyakeni. Likhefu lomkhosi omkhulu wokukhumbula ukuzalwa kweNkosi yabalandeli bakaKhristu, Ngumkhosi wokuthakazelela ukuthi ukhona owazalelwa ukusihlenga kuziphambeko zethu. Ukhona owazalelwa ukuthi umhlaba owawugxile ebumnyameni usuke ebumnyameni ungene ekukhanyeni lokho ayikho khona Yena. Akekho onjengaye, okwavele kwafakazwa ngaye wabizwa ngamabizo ayinqaba.

Umphrofethi u-Isaya wathi, “Ngoba sizalelwe umntwana, siphiwe iNdodana, umbuso uzakuba phezu kwamahlombe akhe. Uzabizwa ngokuthi uMeluleki Omangalisayo, uNkulunkulu uSomandla, uBaba Waphakade, iNkosana yokuThula. Ukwanda kombuso wakhe lokuthula akuyikuba lomkhawulo. Uzabusa esihlalweni sobukhosi sikaDavida laphezu kombuso wakhe, ewumisa njalo ewuqinisa ngokufaneleyo langokulunga kusukela ngalesisikhathi kusiya phambili, kuze kube nininini” u-Isaya 9:6-7.

      Ngamabizo amangalisayo, ayinqaba, uJesu abizwa ngawo.

• Ukuthi unguMeluleki Omangalisayo, kukhomba ukuthi ungummangaliso. Akekho omunye onjengaye okwazi ukwaluleka ngendlela eqondileyo. Nguye yedwa kuphela uJesu lo. 
• Ukuthi unguNkulunkulu uSomandla, kukhomba bona kanye ubuNkulunkulu bakhe. Unguye uMdali olamandla onke. Akukho ukuthandabuza ngalokho. UJesu lo unguNkulunkulu. 
• Ukuthi unguBaba Waphakade, kukhomba ukuba kavezwa ngokuhlelwa kwesikhathi. Wayekhona nininini, ukhona lamhlanje, njalo uzakubakhona kuze kube nininini. UJesu lo ngowanininini. 
• Ukuthi uyiNkosana yokuThula kukhomba ukuthi uyiNkosi ebusayo njalo umbuso wakhe ngowokulunga lokuthula. Abukho ubudlwangudlwangu lakho konke okungaqedakaliyo kowakhe umbuso. UnguJesu, iNkosi yokuthula.

Lakanye, njengokutsho kwesiphrofetho, iNkosi uJesu watshiya ubukhosi bakhe ezulwini wazehlisa, wazalelwa esitebeleni sezinkomo, yena eyiNkosi yamakhosi, ukuze esekhulile ayesifela sonke esiphambanweni asihlenge emacaleni ethu. Kunzima ukwahlukanisa isikhathi seKhisimusi lesikhathi sePhasika. UJesu wazalelwa emzini waseBethlehema oweyisekayo, kodwa elesizatho sokuletha insindiso.

Uyamazi na loJesu? Ungubani uJesu lo empilweni yakho? Nxa ungakamazi njengeNkosi loMsindisi, thatha ithuba usukholiwe ngaye, umvume ngomlomo ukuba uyiNkosi ethethelelayo. Ake uthi uthakazelela iKhismusi le ube uyamazi njengeNkosi loMsindisi.

Yebo, uJesu nguye zwi iNkosi yokuthula, uMeluleki Omangalisayo, uBaba Waphakade, UNkulunkulu uSomandla. Khonza Yena zwi!

Barbara Nkala 

STORIES OF FAITH

Revelation 12:11 says: “They overcame him by the blood of the Lamb and by the word of their testimony; …”. When we tell testimonies of the Lord God’s power and saving grace on our lives, the devil slinks away tail between legs. So, let us share our amazing stories of God’s love in action and shame the evil one.

We look forward to reading your own story of faith in the coming weeks. Your well-written story should be between 600 – 1000 words. Send your story to: barbarankala@gmail.com. Selected stories will be compiled into an anthology of stories of faith.

Look out for the next story in the series next week!

 ***

Siwugoqa wonalo unyaka, kambe kuyini okufundileyo kusona lesi sigcawu? Lathi singathokoza ukuzwa lokho okufundileyo, langabe okukubusisileyo. Ikanti nxa kukhona okukukhubileyo, okungakuhambanga kuhle, kuyimfanelo ukuthi ukutsho ukuze sikunanzelele ngezikhathi ezizayo.

Esikufisayo lesikujongileyo, yikuphakamisa ulimi lwethu lukaMthwakazi. Asilolane Mthwakaz’ omuhle.

 Bala, ucabange, ulobe lawe. UMthwakazi ligugu lethu.

 Ungakhohlwa, esalela muva ithiwa xhaka yizinja! 

Asihlanganeni njalo kuviki elizayo.

Ngiyalithanda, njalo ngiyabonga!

Gogo Nkala