Gogo Nkala Blog 14/2020

Ekuhle Mthwakaz’ omuhle! Lanxa isilo lesi esekhorona silokhu sinkunyayila sidlithiza siginye lapho esikhethe khona, singagqize qhakala, thina uNkulunkulu asasivemele ukuba siphefumule, siyabonga. Impilo ayikho ezandleni zethu. Saqala sazwela udonsi lwesifo lesi kude, phetsheya kwezilwandle. Singenile lasemazwen akithi kwele-Afrika. Amanengi amazwe akwelakithi awazange ajahe ukulungiselela ukulwisana laso lesisilo. Athathela muva. Kodwa, kusukela kuMvulo wamhlaka 30 kuMbimbitho 2020, kwabekwa umthetho othi abantu abahlale ezindaweni zabo, bangaphumi ngaphandele kokuba besiyadinga imithi lokwelatshwa; loba besiyadinga ukudla; lalabo abasebenza ezindaweni zalokhu okusiza uzulu empilweni. Kwathiwa abantu basebenzele emakhaya abo.

 

        Kulokukhala okukhulu isibili ngoba bebanengi abaphila ngokuthenga bethengisa. Bayazisebenza. Nxa sekuthiwa bahlale ezindlini okwamaviki amathathu ababoni ukuba bayaphila bathini lezimuli. Yinkinga efuna ukuhlolisiswa kube lendlela ezasiza abantu.

Izimbongi zethu esizithandayo zilokhu zigabaza zisazisa ngekhorona zisilimukisa ngeyezi elimnyama eligubuzele singananzelele. Nangu uKhuluGatsheni, uMthulisi Ndlovu, lamhlanje esithi:

KHORONA, YEHLISA KANCANE

Zuku-zuku!

Duku-duku!

Thala-thala!

Phazi-phazi!

Phansi-phezulu!

Thula zwi!

Vala tu!

Kuzwakele thunzi lokufa...

Khorona, yehlisa kancane.

Bath' usimo ndidamadoda

Osiyazi bawabhula kubemnyama

Injingalwazi mpu!

Odokotela lezanuse khwimilili!

Omongikazi lezinyanga qhuzu!

Izazi socololo!

Izikhulumi cosololo!

Osozindaba zwi!

Umhlab' umangele

Uluntu ludangele

Izizwe ziphelelwe

Abantu mbo, ngokwesaba

Akuzwisiseki, sesiyathe siyathe...

Khorona yehlisa mbijanyana.

Phetsheya enjuleni zolwandle

Ujule wajulukisa kabuhlungu

Ukhwaz' ompumulondwendwe baginqa

Ondlebe zikhany' ilanga, badideka

Nguban' ongadid' uMadiba na?

Usimo asichazwe mazwi enela

Unyonkoloz' umhlaba,

Ulelephi mfoka Nyongolo?

Nant' igagasi lokufa habe!

Mugabe, utshonephi lesibindi lamacebo pho!

Nanko sakhelw' amamotshari

Sagejelw' amathuna sisabudla...

Izizwe nanzi zibangwa lezibi

Kobuthwa kugqitshelwe kwelekane

Kokhalwa kuze kukhawulwe

Umhlab' udangele bakithi!

Into nje asazi sivelelwe yini

Awu savelelwa Thixo.

Khorona yehlisa phulizi!

Kuwe Somandla,

Mdala wezinsuku lezizwe

Sazi, nyanga, melaph' omkhulukazi

Thixo makhwaza kum' igagasi

Mjabhisi kalusifandini

Ngcwele, ngqwele mvelo

Vel’ uthel' umusa, akusahlekisi

Lo ngumatshayabhuqe

Kudl' onsundu lomhloph' emini.

Owala lokhu uyabe uyazikhohlisa.

Nank' umhlab' ujikelan' inyok' ephilayo.

Lo uthi, ‘Ngulo!’

Lo laye uthi, ‘Ngulowaya!’

Baphethe banindan' udaka

Uluntu lutshabalala lusobela.

Baba weth' osezulwini lasemhlabeni

Sithe gwaqa singabakho

Sikhal' ezimathonsi

Sith' akusiph' ithutshana silungisise

Baba sonile siyazi

Sona sisaz' uqobo

Silenzil' ihlazo sakuhlambalaza

Sizenzil' izinto ngokweth' ukuhlakanipha

Salibala ngezixwayiso zakh' ezingcwele

Baba siyavuma sonile

Wena waxwaya ngokufika kosuku olungaziwayo

Lona suku oluyisithutha

Kodwa hatshi ngeKhorona bakithi.

Ubuhlongandlebe lizaba eliyikufa

Ukungalandel' umbhalo lithuna njalo

Kambe kungabe kuyikho na?

Zingabe ziyizo leziya nsuku zokuphela?

Jehova sizwel' isihawu

Siphe ithutshana silungisise la esaphambanisa khona

Baba jabhisa, yehlis' iKhorona.

Mthulisi Ndlovu

uKhuluGatsheni

SIXOXA NGENGXAKI ZABATSHA

Siyabonana lamhlanje kulesisigcawu munt’omutsha. Ngilokudana okukhulu njalo ngixolisa ukuba lamhlanje ayikho ingxoxo yengxaki zabatsha entsha, eyalamuhla. Indaba ye ‘Lockdown’ ekhona ezweni lonke isitshayile lathi singalindele. Bekumele abangane benu baxoxe ngezihloko ezimbili ezokucina kuloluhlelo. Kodwa kwehlule ngoba phela bengahlali bonke. Omunye ulapha, omunye ule, omunye laye ukude le! Nxa iNkosi isiphathisa njalo isiphilisa, kuzaxoxwa kupheleliswe uhlelo lolu lwezingxaki zabatsha.

        

      Okwalamhla sizabuyela emuva sitshaye umphehlu ngale eyake yabakhona, lapho abangane babexoxa ngengxaki edalwa yikusebenzisa ngobutshapha lobuthutha i-‘Social Media’. Yingxaki okwaxoxwa ngayo ngoLwesithathu ku 29 Zibandlela 2020, encwadini kaGogo Nkala eyesihlanu. Siyafisa ukuwuzwa owakho umcabango ngaleyo ngxaki.

GIYA MTHWAKAZI

Nanzi njalo ezinye izimbongi zethu zalamhlanje ezimbili. Ake sizwe ukuthi zona zithini.

UKUZIMISELA LESIBINDI

Ngokumankala kuhamba lugege

Akukhekhelez’ imiqanso

Akukhekhelez’ imehlelo

Ngolulodwa ngakwesokunxele,

Ngolulodwa ngakwesokudla

Indabankulu yikufika laph’ ayakhona

Kukho mkhumbi

Ongedlulang’ olwandle

Ochaphele ngaphetsheya

Ungabe unamaphiko na?

Akukho nyoni yantshez’ ulwandl’ olubanzi

Achaphele ngaphetsheya

Inga yinhlanzi na?

Kuzo zonk’ iziphepho

Kuzo zonk’ iziphambeko

Giya KaNdaba; kuvel’ isibindi

Indod’ emadodeni

Emelana lesiqhwag’ esinguGoliyathi

Ube yinkum’ enkangala

Ngomsidlana way’ ithumba

Lezinkul’ izinanakazana

Ubukhulu bazo bunganakiwe.

Ngokumankala kuhamba lugege

Akukhekhelez’ imiqanso

Akukhekhelez’ imehlelo

Ngolulodwa ngakwesokunxele,

Ngolulodwa ngakwesokudla

Siyofika kwelesithembiso

Indabankulu yisibindi lokuzimisela

Ukubekezela lesibindi

KubenguMtshazi loMtshakazi

Umusa lothando kube ligula

Elipheth’ amas’ amnandi

Ngolulodwa ngakwesonxele

Ngolulodwa ngakwesokudla

Siyofika kwelesithembiso

Halala halala! kaNdaba

Donatha Timothy Mlawuzi

UKUFA KUKAJESU

Wehla evela ezulwini

Watshiya ubukhosi bakhe

Wayiphila impilo yakhe

Yabonakala inkazimulo yakhe

Phakathi kwabantu

Ayesesondele amalanga akhe

Umsebenzi ayewulandile wawususemnyango

Wathatha abafundi bakhe

Baba lomkhosi wePhasika bendawonye

Wathatha isinkwa wahlephula

Wathi, “Lo, ngumzimba wami.”

Wathela lewayini wathi kubo,

“Leli ligazi lami.”

Wasebalaya wathi,

“Dlanini, linathe lingikhumbule.”

Ukufa kukaJesu kungenxa yesono

Esadalwa ngu-Adam lo-Eva

Kwakungelula kuJesu kodwa wathi,

“Ngabe inkezo le iyedlula,

Kodwa Baba, mayenziwe eyakh’ intando

Bamethes’ icala emsulwa

Wazithwal’ izono zethu

Bamkhafulela, bamklolodela, bamtshaya

Bamthuka, bethi kaphrofithe ukuba

Ngubani lowo omtshayayo

Watshaywa kabuhlungu wazimvivinya

Beluka umqhele wameva bamthwalisa

Bamethesa ihlazo lesiphambano

Wabethelwa emthini waseKhalvari

Lampompoza samfula igazi lakhe

Wahlatshwa ngomkhonto esiphangeni

Waphenduka waba yisinengiso kuYise

UYise wayifulathela iNdodana yakhe

Wangakwazi ukukhangela isono esikuyo

Nango ethi, “Kuphelile!”

Wagebis’ ikhanda wafa

Wahlatshwa ngomkhonto ohlangothini

Kwantshaza igazi lamanzi.

Dukuduku, nanko umhlaba uzamazama

Nanko amatshe eqephuka

Nanko amadwala eqhaqhazel’ eqhezuka

Nanko umhlab’ uvuleka

Kwabamnyama kusemini

Ilanga lafiphala lafihlakala

Ukukhanya kwasitha yibumnyama

Ilembu lethempeli laqhezuka phakathi

Amathuna vulekiyani

Ngokufa kwakhe sanqotshwa isono

UJesu waba ngumhlatshelo owamukelekayo

KuYise ezulwini uSomandla

Ngokufa kwakhe sithole insindiso

Ngokubethelwa kwakhe sithole ukuphila

Ngokufa kwakhe esuliwe amacala ethu,

Siyabonga Ngonyama yomndeni wakwaJuda!

Nokubonga Mpofu

Uyamaz’ UJes’ OyiNkosi LoMsindisi Na?

Sasithi siyamaz’ uJesu oyiNkosi loMsindisi. Sasivele nje sithi ulithemba lamathemba. Sasikhulume ngegunya ukuthi uyindlela, leqiniso, lokuphila. Sitsho sihlabelele sithi unguMalusi olungileyo osikhokhelela emadlelweni aluhlaza. Sibabaze sihawule ukuba wabethelwa emthini, wafa ngenxa yethu. Sitsho singesabi sithi uyinqaba lesiphephelo sethu; uyikukhanya kwethu, singesaba bani na? Nanto igcikwane lekhorona linyonyoba linyenya lingabonwa ngamehlo lihlasela umhlaba wonke. Bayaqhululeka abantu besifa ngenxa yekhorona. Uvalo ngeniyani. Sezikhohlakele zonke izithembiso zeNkosi ezingu ‘Yebo lo-Ameni’. Sekukhohlakele ukuthi uyiNkosi loMsindisi.

Kuyole iviki ezinkonzweni zethu besiyabe sihlabelela uHosana! Besiyabe sikhumbula kakhulukazi ngalokho iNkosi uJesu asenzela khona eKhalvari. Besiyabe sithakazelela umkhosi wePhasika. Besiyabe sikhumbula uhambo lwakhe lonke kusukela enikelwa njuJudasi Iskariyothi, ethonisiswa, eseyiswa, ehlutshwa edelelwa. Wacina ehudula isiphambano sisinda ngenxa yezono zomhlaba. Nango ebethelwa, elenga esiphambanweni lichitheka igazi. Nansi enye yezingoma eletha usizi nxa sikhumbula ngalokho adlula kukho ezabethelwa uJesu. Iphuma ku-Amagama Okuhlabelela, ingunombolo 55.

Nxa ngimbona uMsindisi

Efa esiphambanweni,

Ngiyalahla yonk’ imfuyo,

Nakho ukuzindla kwami.

Ngingephikelele lutho

Oluphambeneyo naye;

Konke engikuthandayo

Ngikudela ngenxa yakhe.

O, bhekan’ inhloko yakhe,

Lezozandla nezinyawo!

Yek’ uthando yek’ usizi,

Olukhulu olungaka.

Ngingayisa ntoni kuye

Efanele ukumbonga?

Anginakho okwanele,

Ngiyamnik’ uqobo lwami.

Kanengi sihlabela amazwi nje kodwa singacabangisisi ngalokho esikuhlabelayo. Isigaba sokucina sibuza umbuzo owesabekayo. “Ngingayisa ntoni kuye efanele ukumbonga?” Kuyini ongakusa kuye mzalwane ukuhlawula uthando lolu asithanda ngalo aze ayechitha igazi esiphambanweni? Mina sengazibuza kanengi kodwa ngehluleke ukuphendula. Kuyini engingamnika khona uJesu okufanele ukumbonga? Konke engilakho ngakuphiwa nguye. Besengivumelana lomhlabeleli nxa esithi kalakho okwaneleyo, okumfaneleyo. Okungcono yikumnika mina uqobo lwami.

      Kodwa, awungeke ukwenze lokho nxa ungamazi uJesu lo. Kumele umazi njengeNkosi loMsindisi. Vuma amacala akho ucele intethelelo uselethuba. UJesu ulokhu esanxusa. Bana ngowakhe uvikeleke okungunaphakade. Lekhorona le ingaze ikuhlasele ayilaso isisindo. Ayilalo udonsi. Yinto nje edlulayo njengamakhoba.

Barbara Nkala

***

ISAZISO

Isaziso sethu sangeviki elidlulileyo asisaphumelelanga ngenxa yendaba ye ‘Lockdown’ elizweni. Asingakhathazeki. Nxa iNkosi isilondile, luyeza uhlelo oluhle olokubalwa kwezingwalo zesiNdebele emsakazweni. Asibekezele. Kuzadlula lokhu okuyingxaki embikazi. Okungapheliyo kuyahlola lanjengoba okuhlolayo kuphela.

Esinya isaziso yilesi: abanye benu mhlawumbe sebemangele ukuthi izinkondlo zabo zingenile ku-blog, kodwa akubanga lesibongo. Kuzalunga. Isibongo sezimbongi zikaMbimbitho sehlule ukufikiswa kahle kuzo. Kodwa sikhona. Bekezelani bant’ abahle!

Okwesithathu, labo abalezingwalo ezangena kumncintiswano wokulotshwa kwamanoveli ngesiNdebele, bayaziswa ukubana abahlolisisa becubungula lowo msebenzi balokhu bephezu kwawo. Silokhu sikhangelele ukubika labo abayathola imivuzo; owokuqala, owesibili, lowesithathu.

Sehlukana lapha lamhlanje Mthwakaz’ omuhle. Kuhle ukuba lawe kulesisigcawu. Ngesakho lawe. Khululeka sizwe ukuthi wena uthini. Awukho umqondo omkhulu, awukho omncane.

Sonke siselimeni lokukhuthaza lokuphakamisa ulimi lwethu. Hlaba eyakho lawe indima ngo2020.

Ukhumbule phela ukuthi esalela muva ithiwa xhaka yizinja.

Ngiyalithanda, njalo ngiyabonga!

Gogo Nkala