Gogo Nkala Newsletter 15/20

Silwimpi K Nyathi

Ekuhle Mthwakaz’ omuhle! Lanxa isilo lesi esekhorona silokhu sinkunyayila sidlithiza siginya lapho esikhethe khona, singagqize qhakala, thina uNkulunkulu asasivemele ukuba siphefumule, siyabonga. Impilo ayikho ezandleni zethu. Saqala sazwela udonsi lwesifo lesi kude, phetsheya kwezilwandle. Singenile lasemazwen akithi kwele-Afrika. Amanye amazwe akwelakithi awazange ajahe ukulungiselela ukulwisana laso lesisilo. Athathela muva. Kodwa, kumanje, amanengi awo aku Lockdown. Lokho kutsho ukuvalwa kwemingcele yelizwe. Kuthiwa abantu abahlale ezindlini zabo kungabikho ukutshobatshoba abantu bethintana. Abavunyelwa ukuphuma yilabo abayabe besiyadinga imithi lokwelatshwa; loba besiyadinga ukudla; lalabo abasebenza ezindaweni zalokhu okusiza uzulu empilweni. Kuthiwa abantu abasebenzele emakhaya abo.

       Okunye okuqakathekileyi siqonqoselwa ukuhlala phansi, yikuthi sigeze izandla zethu ngamanzi alesepa kanenginengi ngelanga. Nxa silayo imitshana le ebulala amagcikwane ezandleni siyisebenzise layo ngokuyigcoba ezandlni. Sithole amamask la okuvala imilomo lamakhala. Kumele njalo nxa sikhwehlela loba sithimula sisebenzise amathishu sihle siwajikele esambuzi loba sikhwehlelele ngaphakathi kwendololwane sigobise ingalo. Kusamele sihahaze imiphimbo ngetshwayi, sinathe amanzi akhudumalayo. Sinathe njalo amanzi alomhluzi welemoni aloluju lwenyosi nxa kuvuma. Nxa singezwa umphimbo uluma loba usoma, loba singaba lophepha olomileyo singenwe luqhuqho, kumele siphange sibone abezempilakahle ukuze sithole usizo.

      Izimbongi zethu esizithandayo zilokhu zigabaza zisazisa ngekhorona zisilimukisa ngeyezi elimnyama eligubuzele singananzelele. Nangu uSilwimpi kaNyathi esithi:

KHULUMA NKONDLO YAMI!

I will not speak!

Ngizothula zwi!

Khuluma nkondlo yami manje!

I will not speak but listen to the tongues of my poetry!

Ngizolalela wena nkondlo yami!

Em' say its illuminati but the voice of truth tells the reality!

Lapho okulwa khon’ indlov’ ezimbili, kufa utshani!

I will not speak, ngizothula zwi!

Kufuneka ukucweba emhlabeni!

Kucweba abanye kudl’ abanye!

Lafa, labhubh’ izwe ngemfuno yokucweba emhlabeni!

Zabulawa izidalwa zikaMlimu,

Zidalwa zikaNkulunkulu azone lutho!

Sosayensi nosopolitiki lidlala ngabantu!

Khuluma nkondlo yami

Ngizolalela wena

Mina ngizothula zwi!

Sakhombana ngemikhonto!

Saphosana ngemamba iphila

Qiniso liyaziwa,

Mbango webhod’ eliconsayo

Ukhand’ amaqhing’ okusus’ abanye udl’ abanye!

Bukhosi ngiyakwesaba

Usho ngegazi nodlame

Kusal’ ontaba kayikhonjwa,

Bafa baphel’ abantu emhlabeni!

Iqiniso lisaziwa,

I will not speak

Khuluma nkondlo yami

Mina ngizothula zwi!

Kanti loncindwa ngabangaki lolo uju?

Ngihleli ngiyesaba!

Ngethukile, vele hlezi ngizobulawa

Khuluma nkondlo yami,

Mina ngizothula zwi!

Uyagedezel’ umhlaba wamazulu,

Avulekil’ amazulu

Kusazonuka umhlaba

Kufa uzulu,

Usazonuk’ umhlaba, kube iqiniso lisaziwa,

Kumboswe ngomloth’ isihonqo sikhona!

Liyosha liphel’ izwe, kucwebe ihlanzana

Amathuna asezinkulungwane!

Khuluma nkondlo yami

Mina ngizothula zwi!

Bayithumel’ imbibizane ye corona,

Yaqed' umhlaba

Lithini ma-Afrika?

Akuqali sekuyimpinda,

Lukhulu luyeza

Babethi luyovinjwa ligagasi,

Nalo likhathele manje

Kudla egazini!

Vimba dlozi lami, naba bayeza!

Vimba dlozi lami, naba behlasela!

Khuluma nkondlo yam'

Mina ngizothula zwi!

Silwimpi da poet!

OkaNyathi

SIXOXA NGENGXAKI ZABATSHA

Siyabonana lamhlanje kulesisigcawu munt’omutsha. Ngilokudana okukhulu njalo ngilokhu ngixolisa ukuba lalamhla ayikho ingxoxo yengxaki zabatsha entsha. Indaba ye ‘Lockdown’ ekhona ezweni lonke isitshayile sonke singalindele. Bekumele abangane benu baxoxe ngezihloko ezimbili ezokucina kuloluhlelo. Kodwa kwehlule ngoba phela bengahlali ndawonye. Nxa iNkosi isiphathisa njalo isiphilisa, kuzaxoxwa kupheleliswe uhlelo lolu lwezingxaki zabatsha.

Okwalamhla sizabuyela emuva sitshaye umphehlu ngale eyake yabakhona, lapho abangane babexoxa ngengxaki edalwa yibudlelwano labangane abangaqonganga. Yingxaki okwaxoxwa ngayo ngoLwesithathu ku 15 Zibandlela 2020, encwadini kaGogo Nkala eyesithathu lonyaka. Siyafisa ukuwuzwa owakho umcabango ngaleyo ngxaki.

GIYA MTHWAKAZI

Nanzi njalo ezinye izimbongi zethu zalamhlanje ezintathu. Ukutshelwa yikuncitshwa. Bala uzizwele.

Julia Sibanda

WOYA! MHLABA KAWUNONI

Woya! Mhlaba kawunoni

Mhlaba kawuzimuki

Mhlaba kawusuthi

Mhlaba kawukholwa

Kunini usidla?

Kunin’ ulokhu uginya?

Kanti singanan’ esakho?

Kanti owakh’ umphimb’ unganani?

Uligovu! Uyisidli!

Ngiyakuzonda!

Izolo lapha nje

Besizihlalele pekle!

Sichelesile nje

Ngob’ ungculaza umfowenu

Isitha sethu

Sesimtholel’ uMnqobi

Ama-ARV.

Lamhlanje wena thutshu!

Udabuka khonal’ eChina

Wamemetheka samlilo wegusu

Wantantalaza wachaph’ amabhoda

Ucimezil’ ungagqize qhakala

Wabantinyela sanyosi zegona

Zaqhinqw’ izililo le lale

Kwasala mfelokazi

Kwasala mfelwa

Kwasala ntandane

Kukant’ eminy’ imizi yavalwa  ngamahlahla

Usutshaye waqhothula wena

Awukhethi limi

Awukhethi mbala

AmaChina uphose wawaqeda

AmaTaliyana uphose wawathanyela

ESpain lakh’ ubakhukhule

IGoli awulicezanga

Ngitsho leZimbambwe ubonakele

Umhlaba wonke mbo!

Izikolo, izitolo lamabhizimusi

Konke sokuthe ntsi!

Abahambayo mpu!

Abantu ezindlini mpo!

Kuthiwa yiLokhudawuni

Ofun’ ukukunqoba

Kumel’ aqhelelane lolunengi

Ahlamb’ izandla njalonje

Ngamanzi langesepa

Satsha ngawe mthakathindini

Saswel’ intokozo ngawe

Awu! Corona

Corona

Covid-19

Awusixekele bo!

Julia Sibanda

Martin Mlilo

UMAQUPHUNA

Uyagulelwa, khumbula kusembeswa

Bathi kuphelile ngawe mus’ ukukhungutheka lisekhon’ ithemba

Shaya phansi ngedol’ umbize uJehov’ uMdala wezinsuku

Indlebe yakh’ ayithundubezwang’ ukuzw’ ukukhala kokholwayo

Shay’ umaquphuna womthandazo

Ushay’ ucikize impi yemimoy’ esemkhathini

EGetsemane mhlan’ ibambil’ impi

USathane esith’ ungumahluthun’ umbuso

Umathand’ ukubukwa njengesidlodlo lo

Yagadla ngomthandaz’ impande lenzalo kaDavida

Yamhadlabul’ uSathane wayobayoba njengohamba phezu kokhethe

Wamethes’ amalahl’ atshisay’ ekhanda

Ngumaquphuna lo

Isand’ esiqhekez’ amadwala

Ngumdikadik’ oPhawuli loSila bagadla ngaw’ entolongweni konakala

Umthandazo ngumasiphuna, umavula kuvaliwe

USathane umgobho nxa ethi’ uvale wavitsha wafica ngesafice

Kholwa, biz’ uJehova umahlala kwelesithath’izulu

Yingangamshela le

Zincish’ ukudl’ uboph’ isisu ngeqhele

Ushay’ umaquphun’ oquphuna ngitsho bethi

Bathame ngemigcoz’ abayemb’ enzikini yolwandle

Fafaz’ igazi leMvan’ umathancis’ imjibila kaSathane

Umthandaz’ uzamazamis’ isigodlo sikaSathane

Esisekujuleni kolwandle

Kuvel’ imbane amadimoni athuthumele

Ngumaquphuna lo

Impi kaSathan’ ihlasela nxazonke

Ngitsho labangabakho bekufulathela njengoJosefa labegazi lakhe

Nxa bethi kuphelile ngawe mkhonzi

Mana kancane kengikuncwebe indlebe kancane

Kukhon’ uJehova ohlala kwelesithathu izulu

Mbize, uyezw’ imithandazo yabangabakhe

Zilala ziseqa umbombo

Uyazesul’ endlal’ itafula phambi kwezitha zakho

Phambi kokuth’ uthath’ umfanekiso wokufa

Val’ igumbi lakh’ umkhulek’ omncane kuJesu wanele

Insizi zikudidile

Abanye besithi yana le

Wena ungayi ngxenye

Lingis’ uJobe ushay’ umaquphuna

Uyakubiyela ngomlilo wamazulu omalavulavu

Ulal’ obukaBhuka

Igazi lakhe lanel’ ukukuvikela

Ngumaquphuna lo!

Martin Mlilo

Lizom Ncube

LIMUKANI!

Nans' ingozi

Badala kwenzenjani?

Okuncweb' indlebe ngowakho,

Limukani ngiyalilimukisa!

Lingaph' izulu?

Izifuyo zaphela kwenzenjani?

Lisawakhumbula yin' amasiko?

Limukani ngiyalilimukisa!

Isizwe sadabuka phakathi kwenzenjani?

Buph' ubuthwakazi bethu?

Sizwe sakithi,

Limukani ngiyalilimukisa!

Kusayiwa yin' eNjelel' ukuyacel' izulu?

Kusayiwa yin' eguswin' ukuyaqoqoda?

Ngiyabuza badala,

Ngicela impendulo.

Basaphathana njengabezolo obaba labomama na?

Yin' abadal' emagumeni?

Bon' abantwana basakwazi na,

Ukuthi umzali yisihlahla bani?

Usizi lezinyembezi kwangembesa,

Ngikhalel' ubuthwakazi bukaMthwakazi.

Abakwelamathonga bakhangele!

Balel' obuvukway' ubuthongo.

Awasekh' amadod' atshay' ingquz' emigidweni

Sekulalaw' atshay' igqomu lama piyano

Abasekh' omam' abagid' isitshikitsh' emigidweni

Sekulalab' abatshay' ogobisiqolo.

Kunzima kwelikaMthwakazi

Kodwa ngiyaz' okhokho bakhangele.

Loba nje sintul' isizwe

Ngilethemb' ekucineni bazasigoqa.

Limukani ngiyalilimukisa,

Ulimi luzabhubha nxa lingakunaki,

Isizwe sikaMthwakazi siyokufa nya!

Ngob' esingela masiko sifil' isizwe.

Lizom Fanwell Ncube

Umahlokomisa Iqhawe Langempela

Umthandazo

Bathandekayo, sibhekane lesilo lesi esingabonwa ngamehlo enyama, kodwa esesivakatshele amazwe onke omhlaba, satshaya savuthuza emazweni amanengi aphetsheya. Sihlalele ovalweni ukuthi pho, singangena siphelele emazweni akwelakithi, sobaleka sicatshephi. Akubalekeki. Akucatsheki. Kambe singafohlela nje senze umathanda? Siyala ngeGama likaJesu Khristu! Thina sizacatsha ngaphansi kwamaphiko eNkosi ePhezukonke, engunaPhakade! Nanku umthandazo oyinqaba esimi kuwo njengamaKhristu, ngoba izithembiso zeNkosi zingu Yebo lo-Amen! Ake ume ngawo umthandazo lo uwutsho insuku zonke kuviki lonke elizayo.

IHUBO 91

1Lowo ohlala ekusithekeni koPhezukonke uzaphumula emthunzini kaSomandla.

2Ngizakuthi kuJehova, “Uyisiphephelo sami lenqaba yami, uNkulunkulu wami, engithemba kuye.”

3Ngempela uzakuphephisa emjibileni womthiyi lasesifeni esibi esibulalayo.

4Uzakusibekela ngezinsiba zakhe, uzuze isiphephelo ngaphansi kwamaphiko akhe; ukuthembeka kwakhe kuzakuba yisihlangu sakho lenqaba yakho.

5Awuyikwesaba umnyama wobusuku, loba umtshoko ontweza emini,

6kumbe ingozi ehahabela emnyameni, kumbe umkhuhlane obhubhisayo emini enkulu.

7Abayizinkulungwane bangawa eceleni lakho; itshumi lezinkulungwane esandleni sakho sokunene, kodwa kakusoze kusondele kuwe.

8Uzaphosa nje amehlo akho ubukele ubone ukujeziswa kwababi.

9Ungenza oPhezukonke abe likhaya lakho – yena uJehova oyisiphephelo sami –

10lapho-ke akulangozi engakuwela, akulamonakalo ozasondela ethenteni lakho.

11Ngokuba uzayala izingilosi zakhe ngawe zikulinde kuzo zonke izindlela zakho;

12zizakuphakamisa ezandleni zazo, ukuze ungakhubeki elitsheni.

13Uzanyathela isilwane lephimpi; uzasigxoba isilwane esikhulu lenyoka.

14“Ngokuba uyangithanda,” kutsho uJehova, “ngizamkhulula; ngizamvikela, ngokuba uyalinaka ibizo lami.

15Uzangibiza, ngimphendule; ngizakuba laye ekuhluphekeni, ngizamkhulula ngimenzele udumo.

16Ngizamsuthisa ngempilo ende ngimtshengise insindiso yami.”

Ndebele Contemporary Version (IBhayibhili EliNgcwele) Copyright © 2003, 2006 by Biblica, Inc.®

***

ISAZISO

Isaziso salamhla yilesi: abanye benu mhlawumbe sebemangele ukuthi izinkondlo zabo zingenile ku-blog, kodwa akubanga lesibongo. Kuzalunga. Isibongo sezimbongi zikaMbimbitho lezikaMabasa siyeza. Sonke sithiywe yi ‘Lockdown’. Bekezelani bant’ abahle!

Okwesithathu, labo abalezingwalo ezangena kumncintiswano wokulotshwa kwamanoveli ngesiNdebele, bayaziswa ukubana abahlolisisa becubungula lowo msebenzi balokhu bephezu kwawo. Silokhu sikhangelele ukubika labo abayathola imivuzo; owokuqala, owesibili, lowesithathu. Kodwa lalokhu akuseyikwenzakala ngokulungiselela kwethu ekuqaleni konyaka. Mhlawumbe sekuzabikwa imiphumela ekupheleni kukaNkwenkwezi sebesebenze kuhle baqeda abakhangele umsebenzi.

Sehlukana lapha lamhlanje Mthwakaz’ omuhle. Kuhle ukuba lawe kulesisigcawu. Ngesakho lawe. Khululeka sizwe ukuthi wena uthini. Awukho umqondo omkhulu, awukho omncane.

Sonke siselimeni lokukhuthaza lokuphakamisa ulimi lwethu. Hlaba eyakho lawe indima ngo2020.

Ukhumbule phela ukuthi esalela muva ithiwa xhaka yizinja.

Ngiyalithanda, njalo ngiyabonga!

Gogo Nkala