Gogo Nkala Newsletter 10/20

Sithembile Siqhoza

Lililili! Lililili! Halala! Siyagiya Mthwakazi lamhla ngabanengi abethu abathandekayo abebesesigodlweni eHarare, kumkhosi omkhulu we National Arts Merits Awards (NAMA). Ube ukhona ngoMgqibelo ilanga lisithi 29 Mbimbitho 2020. Sibatshayela ihlombe bonke abaphakanyisiweyo bathola imendulo lezithupha ezibenzela amhlophe. Kodwa, esimmbambatha kakhulu yimbongikazi yethu uSithembile Siqhoza ophume etshethe isicoco esihle kakhulu esenza simtshayele umpululu levokloklo. Amhlophe athe nke, nke, nke!

Kuwe ngqungqulu yezingqungqulu

Wen’ onqolongw’ emoyeni

Wen’ okaSiqhoza

Wena Ndlovukazi yosiba

Wen’ ohaya kuqaqambe

Kube sengathi kuqhum’ ibhazuka

We’ okade watsho

Ukub’ uyingadlangadla

Wen’ odubula ngamagama

Wen’ osubuthe za yinqwaba izicoco

Halala! Lilililili!

USiqhoza uthole umvuzo ngenkondlo yakhe akloloda enqolonga ngayo esithi, VUMA NGIKHULE LAMI. Wena obe ungekho, lawe oweqiwe zindaba ezimnandi, sithi ake uzizwele ukuthi igiya isithini intomb’ endlala uSiqhoza kaZingizwan’izinja.

   Siqhoza’s certicicate    

Sithembile Siqhoza holding her accolades

VUMA NGIKHULE LAMI

Nank' umgwang' ufun' ukungigangela

Ngesis' esikhul' esigcwel' umoya

Bahleka ngawobuso, awomhlath' elumile

Bazenz' omahlomulel' abangabahlanguli

Zimpis' ingwe zamabalabala

Suk' ebusweni bami xhegundini

Vuma ngikhule lami.

Yiziqumama ingqondo du!

Manje mina ngiyisanqondo

Isiqoqodo ngingahlangana longqondongqondo.

Khuzan' imigakla

Igxozel' ithambo lezinyan' indenda

Igxozel' iqatshana lengane

Angisabali umhluz' iyahubula

Ihahabela ngitsho lomsipha

Lenhlon' abal' imbala

Luhubhuhubh' uphondo lukabhejane

Ngamaland’ afun' imikhaza.

Zintwal' ekhanda

Ingamuny' isuthe

Iyakhithika.

Ngoqilingqwatshu ongqavungqeketshe

Intethe yehlul' amaland' ebusika

Banithinithiz' ezinonileyo

Qede besulel' imilomo phansi njengenkukhu

Kimi liyesabeka lifana lamazimu

Ngixoleleni lami ngikhule.

Ezen' ingane zidla ntofontofo

Azingangami zingangomam' ongizalayo

Zadl' imfundo zakhweca

Lami ngikhwinc' amalogwe ngiyafun' imfundo

Usungacathamel' ungiphicaphic' ungilayele celeni

Ungithembis' izul' emhlabeni

Awuu suka somaxhegwana!

Gwedlela le lami ngikhule.

Ungangiphazamisi ngigid' ingoma yami

Lisa ekhon' idlozi lifun' ukusina

Ngipheth' umkhonto letshoba ngiyaziphungela

Ngifun’ umlol' olol' inkakhayi zamadoda

Ngifun' inyon' ekhihliz’ IKUSASA

Lamathemb' amahle

Ngivumele ngikhule.

Ikhaba liyabukw' alidliwa

Khabo ngekela ngikhule

Ngibe lekusasa eliqhakazileyo sambali yentwasa.

Ubaba lomama baziqhenye ngami

Sengikhulile ngibenzel' okuhle

Wena Mthunzi

Vele ufun' ukungehlis' isthunzi.

Mkhohlisi kad' ubakhohlisa

Skhohlakali bekubiza nge BLESSER

Awu makade bona wakithi

Usubona buvilibana uthi kugug' othandayo

Indwang' ayisibon’ isiphongo sayo.

We Batayi

Iqaq' alizizw' ukunuka qiniso

Manje ngithi

Isichib' esitsha ngeke sichibil' ibhulugwe lidala

Ubozinuk' amakhwapha we ‘BLESSER’

Ungangiyengi Yengwayo

Ngiyaz' emlonyeni upheth' awokusiza

Esandlen' upheth' umhedla

Ufun' okukimi

Ukuqathaqathe qed' ungiqotshele

Ungenz' isiphukuphuku

Vuma ngikhule lami

Sithembile Siqhoza

SIXOXA NGENGXAKI ZABATSHA

 Iyabonana njalo lamhla lin’ abatsha bakaMthwakazi! Ingxoxo ephathelene lengxaki zabatsha ekhokhelwa nguyihlokazi, uNomsa Jowah iyaqhubeka.  Lamhla silokhu sikhangele ingxaki ezidalwa yikungasebenzisi kuhle inkululeko lamalungelo aphiwa intsha. Inkululeko yokwenza lokho umuntu akuthandayo inhle. Lamalungelo oluntu mahle kakhulu. Akukho ukucindezelwa lokukhahlamezeka. Kodwa amalungelo la angaphathwa butshapha adala ingxaki empilweni. Sondela uzwe ukuthi baqhubeka besithini ngalokho osowenu. Siyafisa ukuzwa ukuthi wena uthini ngakho?

GIYA MTHWAKAZI

 Nxa imbongi yayiyabe isiphuphuma ngosinga, igiya, iseqa, ijanquka, ibetha amagama akhuthazayo avusa idlabuzane lokwenza; ayekekela amanina, alilizele, udutshulwe umpululu, obaba lamajaha batshaye ivoklokolo! Kwakumnandi kakhululu. Loba uzibalela wedwa, ake ukekele lawe uyithuze ivokloklo ngoba imbongi zethu lezi ziyasikholisisa kakhulu. Asizitshayeleni ihlombe! Nanzi zisiqumbaqumba ngolimi lwethu lukaMthwakazi oluhlabusa kangaka! Ayitshe ivokloklo lapho okhona aze ahawukele lobengabazi ubumnandi bolimi lwethu lomdabu! Bala uncinde iminwe ufunza ingqondo. Ezinye njalo inkondlo zivusa umoya wolaka lokunqanda ububi obudlangileyo. Ziyaxwayisa. Ikanti ezinye zifukamele umoya wosizi lokuhlulukelwa. Kukho konke siyafunda, siloleke, sivuke senze.

            Silazo njalo imbongi zenu ezizingcwethi. Hlala phansi, ubale uzizwele. Nangu uNomathemba Moyo esenwaya ubuchopho esithi, ‘Inkomo ZikaBaba’.

             

 

Nomathemba Moyo

INKOMO ZIKABABA

Zihlakazekile zigcwel' iganga

Ezinye sezilamathol' angelaphawu

Ezinye zifel' emangweni

Ezinye sezingamatimela

Ezinye ziyikudla kwamaganyana

Ingabe ziswel' ukudla na?

Ziswel' abelusi kumb' isibaya?

Ngiphenduleni ngisemnyameni

Kutheni ngomhlambi kababa?

Ingab' uzosinda na kulezimpisi

Phela zivez' amaziny' indawana yonke

Zophephelaph' inkomo zikababa?

Seziphenduk' amabhalalabhala

Zeq' umbel' isango livaliwe

Zisinda ngokulambis' emadlelwen' azo

Konakelephi zinyanga zakithi

Konakalephi sizw' esimnyama

Sono ban' esingathethelelwayo

Kuyoze kube nini sibhudul' egangeni

Kuyoze kube nini zisemasisweni

Abayikukhathala na abasisiweyo

Phela lokhu sekudlulele ngiyatsho

Kunini kuthiw' azibuy' emasisweni

Zobuya kanjani kungel' abelusi

Ihlekan' ebelisele lihlatshw' ukusa kwamalanga

Zisale zibhons' emswanin' onina

Kubuhlung' ukuswel' okwakho

Kubuhlung' ukuswel' umelusi

Zophephelaph' ezikababa

Nanko zigqagqelwe libhubes' esibayeni

Sekunzim' emuva laphambili

Amajongos' asehlathini

Amathokaz' ayefula

Ingabe kuyaphileka kulawomadlelo?

Kuyentshisek' ungaz' okusemuva na?

Amankonyan' abhonsa kukhithik' umuhlwa

Pho ayozwiwa nguban' onina bephetsheya?

Basuke besiyafula bagcwalelwa ngumfula

Sekunzim' ukubuyel' esibayeni

Phel' awubonis' ukwentsha lomfula

Kazi kozala nkomoni

Kazi kolunga nin' atholakal' umelusi

Fun' avuselele lelihlekan' eliseleyo

Akulahlwa mbeleko ngokufelwa

Ngilethemba usazohlangan' okababa

Atshakadul' aqolotsh' amankonyane

Sisazovuk' isibaya sikababa

Sisenge siphind' umphehlo

Siklez' izisu zicazimule

Kuyabe sekulungile kwethu

Uzathi ngatsho!

Nomathemba Moyo

*

 Passmore Ndlovu

VUKA MNTWANA!

Mayeeeeeeeeeeeee!

Kanti kwenzenjani boooooooo?

Nang’ umntwana enunubal’ etshwabhana,

Entshintsha ngitsho lombala

Ngabe kwenzenjani?

Ntombazana, wantshintsha umbal’ usukhulile yindaba?

Wanunubala, wanembuluka sadelele

Uzihambela nje, yini kodwa?

Uthi uyakubona yin’ ukuthi

Ubutsha bakho awusabukholisanga

Mayeeee, ak’ uvuke mntwana

Kanti majaha kwenzenjani?

Lajwaq’ ebusweni libancane kangaka

Ibhonga-ke, angisakhulumi,

Ngoba ayisilo bhonga kodwa

Yilokhu osokwalingena emphinjeni yenu

Okhulu labokhokho bethu

Bebebhema ingidi

Kodwa lina selidlulis’ amalawulo,

Aliboni yin’ ukuthi liyazibulala?

Akukhanyi yin’ ukuthi selikhulile?

Akuveli yin’ ukuthi kufa lina?

Akubonakali yin’ ukuthi

Liyazikhawulisa njeee mayeee!

Vukani bantwabethu!

Wenziwa yini ukuthi wenzele umngane wakho

Yebo-ke bathi izandla ziyagezana

Kodw’ uma zingcolile ziyangcolisana

Akuvuke mntwana, uziqoqe,

Uhlale phansi uzinze

Ube suyabona ukuthi wenzani ngempilo yakho

Mntwan’ oyintombazana

Lawe mfan’ ukona lokoniwa libancane

Akusikh’ okuphelela khona impilo yakho

Akuvuk’ ubon’ ukuthi wenzani ngempilo yakho

Vuka mntwana!

Passmore Ndlovu

*

Hlengiwe Winnet Dube

ANGISAKHULUMI

Ungitshiy’ usithi uyading’ imali,

Lami angizange ngiding’okunengi,

Kanti wen’ uyading’ ubukhwa.

Ngathaba ngath’ uyading’ impilo,

Ngith’ eGoli kugolwa igolide,

Kanti iGoli iginy’ abantu babeyimigewu,

Kangisakhulumi ngoba awusabuyi.

Izolo kuwe benginuk’ amakha,

Ngingawatholanga ngigeza ngomlola qha,

Namhla seginuk’ amaququ saqaqa.

Ngiqale ngisakhuluma

Ngithi uzangikhumbula,

Ngadubeka ngaphel’ inkani,

Nganyel’ izithende sakiti,

Wen’ uqhiyeme uliqhawe likaMaGwebu.

Uqhele okwesilulu,

Usidla nyama, udle nhlama,

Mina ngacaka samkhenkethe,

Izingane zathi baba ngebizo,

Zingaz’ elakh’ izinyo ngob’ ubaba,

Hay’ angisakhulumi lam’ angisakufuni.

Ngikhuluma law’ ungumful’ ogcweleyo

Uhwabha kunyikinyek’ umduli,

Ngicel’ imali uthi kawusibhanga,

Ungephul’ inhliziyo ngikuthanda.

Ngabekezelel’ uthando, angisakhulumi,

Eyami sililitshe ngob’ angisakuthandi.

Umndeni wathi yakhan’ umuzi,

Sibaphiwe abantwana sabong’ umuzi,

Egumeni lethu kuNokuzola,

Basola besasola oNokusola,

Kangisakhulumi babesazi,

Impis’ embeth’ esemvu nguwe nta!

Hleziphi Winnet Dube

 

 *

Martin Mlilo

AMANXIWA, NGAMANXIWA!

Lawa ngamagumb’ abadlwenguli

Bayadel’ abangaziyo

Abangazange babone imduli yomuzi wamakhosi lo Osungamanxiw’  asemile  lembuya.

Ngiyafunga, ngiyagomela

Kungaphum’ insingizi la!

Imduli yaxathuka kwavela lembambo.

Yeka bethi ubukhosi ngamazolo,

Kwake kwaba kontuthu ziyathunqa,

Intuthu eb’ iphehla amanzi kagesi

Iqonge kufiphal’ ilanga emini.

Namhlanje komile okwake kwaba yiziziba,

Namhlanje ngamazibuko umuzi wamakhosi,

Uphahla lwendlunkulu luyanetha

Ngamanxiwa la, isidlidli somuzi

Namhlanje simanephunephu

Ngisifanisa lendlu kathekwane,

Imigwaqo yimlonga yagugudeka

Imigwaqo yedolobho likaMthwakazi

Yinto yangabomo le howu!

Lina nkokheli zelizwe

Lizigqaja ngani,

Umuz’ obulenkazimulo lodum’ ukhithika?

Ubhidlika lina ligoq’ izandla,

Limgwilibana liyanganxanye njengamanzi omsenya.

Lokh’ elikubiza isgodl’ akuson’ isgodlo

Lubandlululo bani lolu?

Konk’ okuligugu kuMthwakazi likucikela phansi.

Zonk’ inkomba zesizwe samaNdebele

Lifuna zinyamalale, ezenu zimi

Zikhanya njengobhaqa oluphezu kwentaba

Imiphongolo yakithi koBulawayo

Ilihluphe ngani, idleni kabani?

Yekan’ ukuba ngumahlinz’ umhlubulo wenyoka,

Lin’ elisebatsha, musan’ ukuqhulul’ amehlo

Lathula nje lahlala lanethezeka lingagqize qhakala,

Umuzi wakoBulawayo ubhidlizwa ngabantukazana.

Lani nkokheli zamany’ amazwe,

Langcin’ imilomo lamane laqhatha inkevane nje!

Sihlomuleleni, kuza igagasi lasolwandle

Lizobhidliza umuzi wamakhosi,

Suka kompunz’ idl’ emini,

Injelele yabhidlika sathi yebo sikubonile,

Sahlamba sahlala

Manje lizulela imphongolo yakontuthu njengamanqe

Sabhidlika, saphela isgodlo sakomkhulu

Ngamanxiwa lawa.

Imigwaqo lixhaphozi,

Izakhiwo zonke zimi ngoluthi,

Siyinhlekisa sihlekwa lazinyoni

Ngamanxiwa anxibeneyo axakekileyo.

Ukuthi kusedolobheni yikubhuqa nje

Lunxiwa lolu.

Martin Mlilo

 UMUSA WANSUKU ZONKE

Umhawu Uzala Umona

Umhawu mubi, ungcolile. Awuhloniphi ukuthi abantu bayazalana, ngabegazi. Umhawu uyafohlela kucine kungasela budlelwano, sokuyingxabangxoza, sekuzondwana, sekunyonkolozwana, sekubulawana. Nxa usungenile uyadunga, uhlanyela umona, ukuthandana kuphele du.

            Yikho okwenzakala emulini kaJakhobe. UJosefa, owayemncinyane ebafaneni bakaJakhobe abadala, ngaphandle komnawake uBhenjamini, kodwa eyintandokazi kayise wazondwa ngabafowabo baze baba lomona ngaye. Wayethandwa nguyise okwedlula bonke abanye, uyise wamenzela ijazi elaliceciswe kakhulu limibalabala. Laye uJosefa wayeke wabaceba abafowabo kuyise. Njalonje wayelesipho sokuphupha izinto eziba liqiniso. Ngenxa yobuntwana wayesuka angani uyabagqabhazela abanye ngoba amaphupho ayemtshengisa ephakeme okwedlula bonke. Amaphupho akhe enza bamzonda ngamandla.

            Lafika ilanga eliyisithutha lapho uyise amthuma kubafowabo ababesemadlelweni ukuthi ayebona langabe bayaphila kuhle kanye lezifuyo. Wahamba uJosefa. Bavela bambona esekude, batshelana bathi, “Nanguyana umphuphi loyana esiza …Kasimbulaleni simphosele kwelinye lamagodi la besesisithi udliwe yisilo esesabekayo” uGenesisi 37:19, 20a. Babenyaza ngokuthi bazake babone-ke lapho okuyaphelela khona lawomaphupho. URubheni, umfowabo omdala wakhuza ukuthi bangambulali, bangachithi igazi. Wathi kungcono aphoselwe egodini. Kodwa bacina bemthengisela ama-Ishmayeli adlula lapho. Babulala imbuzi, bagxamuza ijazi lakhe elihle egazini basebesiyaqambela uyise amanga, benza engathi udliwe yisilo egangeni. Wadabuka kakhulu umuntu omdala engazi ukuthi ngumsebenzi womona wonke lowo.

            Wawuke uzithole usulomhawu omkhulu uze ufisele omenzela umhawu ukufa? Zikhuze. Musa ukufuya isikhwili emoyeni wakho. Lokho kwenza umona uchamusele, uchahe. Uyabe usugalula phakathi kwesono. Zikhuze uyixotshe imicabango yomhawu ukuze uphephe.

Qaphela imicabango yomhawu uyixotshe ingakafukameli yachamusela umona.

Barbara Nkala

                  ***

Sima lapha lamhlanje Mthwakaz’ omuhle. Siyafisa ukuzwa kuwe ukuthi isigcawu lesi sikuthinta ngandlela bani. Siyalangatha ukuzwa ukuthi eyakho imibono ithini ngoba ulawo umcabango ongasisiza ngawo. Siyanxusa. Asibeni selimeni lokukhuthaza lokuphakamisa ulimi lwethu. Hlaba eyakho indima ngo2020 uyiphutshe.

Ukhumbule phela ukuthi esalela muva ithiwa xhaka yizinja.

Ngiyalithanda, njalo ngiyabonga!

Gogo Nkala