Dr Eventhough Ndlovu
Siyadibana njalo Mthwakaz’ omuhle kulelilanga elihle esiyagqiba
uNhlolanja! Lamhla sivula ngamazwi okukhankasa ngokuhle okuthile avela kuDr
Eventhough Ndlovu oweNyuvesithi enkulu eZimbabwe. Kulamalanga lamalanga
athakazelelwayo umhlaba wonke jikelele. Ubusazi na ngaleli ele International
Mother Language Day? Hatshi-ke, mina lingipha amadlabuzane leli ukwazi
ukuthi lolimi lwami lomdabu luqakatheke kakhulu kusamele luqakiswe kube
lomkhosi wokuluthakazelela! Ake uzwe ukuthi uthini okaNdlovu.
INTERNATIONAL MOTHER
LANGUAGE DAY
Hlabezulu, manengi
amalanga athakazelelwayo emhlabeni bo! Elinye lawo eliqakatheke kubani lobani
okhwabitha ukukhulisa ulimi lwakhe lomdabu, yileli elikhuluma ngokuthakazelela
ulimi lwakho lomdabu, olukhankaswa umhlaba wonke. Lilanga lamhlaka 21 Nhlolanja
njalo umkhankaso lo waqala mhlaka 21 Lwezi ngo1999, kukhokhela inhlanganiso
ye-UNESCO eyiyo ekhangela ngezemfundo kuNhlanganiso zamazwe wonke jikelele.
Isisusa
sona saba yisiga esabakhona ngosuku luka 21 Nhlangula ngonyaka ka-1952.
Abathile eBengali, kweleBangladesh babekhankasa ezitaladeni betshengisela
isifiso sabo sokuthi bakhulume ulimi lomdabu wabo bekhululekile. Kodwa
iziphathamandla ezazibeke ukuthi kukhulunywe kuphela ngolimi oluthile
kwazicunula lokho zasezibangela ukudutshulwa kusethuselwa labo ababekhankasa.
Kwafa -ke lapho abafundi abane. Kusukela lapho ilanga leli lahle laba
yisikhumbuzo salokho okubi okwenzakalayo. Leli lilanga lapho okuqakiswa khona
umkhosi wokuphakamisa konke okuphathelene lezindimi ezitshiyeneyo, amasiko
atshiyeneyo lokwanelisa ukukhuluma izindimi ezinengi ezahlukeneyo.
Lonyaka eZimbabwe, umkhosi lo uzathakazelelwa mhlaka 20 kuMbimbitho,
eNyuvesithi yeZimbabwe, eLlewellyn Lecture Theatre ngehola lesificaminwe mibili
ekuseni (0800 hours) lapho okuzakhangelwa khona isibanga esesithethwe
sikhangelane lemizamo yokuphakamisa indimi zakwelakithi lokusetshenziswa kwazo.
Kuzakuba lezikhulumi ezivela kungatsha ezehlukeneyo lapho okuzahlonyiswana
khona ngamasu lamaqhinga okuthi kungenziwani ukuthi kuthuthukiswe
ukusetshenziswa lokuqakathekiswa kwendimi zethu. Elokuzwa kalisuthisi njalo
ukutshelwa yikuncitshwa! Bana yingxenye yalo umkhosi lokhu injobo enhle ithungelwa
ebandla. Akubizwa ozwayo.
Phakamisa olwakho ulimi lawe Mthwakazi!
SIXOXA NGENGXAKI
ZABATSHA
Iyabonana njalo lamhla lina Batsha bakaMthwakazi! Nansi njalo enye
ingxoxo ephathelene lengxaki zabatsha ekhokhelwa nguyihlokazi, uNomsa Jowah.
Azipheli ezabatsha. Lamhla sikhangela ingxaki ezidalwa yikungasebenzisi kuhle
inkululeko lamalungelo aphiwa intsha. Inkululeko yokwenza lokho umuntu
akuthandayo inhle. Lamalungelo oluntu mahle kakhulu. Akukho ukucindezelwa
lokukhahlamezeka. Kodwa amalungelo la angaphathwa butshapha adala ingxaki
empilweni. Sondela uzwe ukuthi bathini ngalokho osowenu. Siyafisa ukuzwa ukuthi
wena uthini ngalokho?
GIYA MTHWAKAZI
Nxa imbongi yayiyabe isiphuphuma ngosinga, igiya, iseqa, ijanquka, ibetha
amagama akhuthazayo avusa idlabuzane lokwenza; ayekekela amanina, alilizele,
udutshulwe umpululu, obaba lamajaha batshaye ivoklokolo! Kwakumnandi kakhululu.
Loba uzibalela wedwa, ake ukekele lawe uyithuze ivokloklo ngoba imbongi zethu
lezi ziyasikholisisa kakhulu. Asizitshayeleni ihlombe! Nanzi zisiqumbaqumba
ngolimi lwethu lukaMthwakazi oluhlabusa kangaka! Ayitshe ivokloklo lapho okhona
aze ahawukele lobengabazi ubumnandi bolimi lwethu lomdabu! Bala uncinde iminwe
ufunza ingqondo. Ezinye njalo inkondlo zivusa umoya wolaka lokunqanda ububi
obudlangileyo. Ziyaxwayisa. Ikanti ezinye zifukamele umoya wosizi
lokuhlulukelwa. Kukho konke siyafunda, siloleke, sivuke senze.
Osungula lesisigcawu
lamhla nguMpumelelo Ncube etshiseka ngendaba yamaCimbi.
Mpumelelo Ncube
AMACIMBI
Ikhalil’ inyoni ethi, “Mahontje, Mahontje!”
EGwanda, eSolusi, ePlumtree, eKezi
Ngoban’ abakhokhoba besehla benyuka?
Yeka mhlobo kawazi ngani,
Kusil’ amathez’ ayatheza
Kuhlwil’ umtshitsh’ uyathungatha
NguMpalakazi, uZibandlela loMabasa.
Umsindo phothololo emangweni,
Juba ntendeni giya sibone phela!
Ingatsha klwebu ziyoph’ izihlahla.
Umkhos’ uhlatshiwe zilahlekelwe phela
Wena mvevane kusasa uzaqandela phi na?
Inqobo yinzuzo kant’ ikusasa liyembelwa.
Awuboni ngani luhonyane lolo!
Tshiy’ ubuhaga yeka lukhule.
Izinyoka ziyabibitheka kutsh’ umphathi
Ngolwesithathu mthakathindin’ udingan’ ehlathini
Njengomsweny’ azanyamalal’ inkengan’ ingene
Komhla sahloniph’ amazul’ ovuleka.
Kukompunz’ idl’ emini libalele
Yizihonq’ ipakil’ impi kaMgandane
Zithuthandini lahlan’ amakhub’ enu
Saphel’ isitshebo loqond’ itshukela
Ingenil’ impi yembubhiso labahuquluzi
Kosala kubeth’ ibhungane lebhungayezi
Selidume ledlula lel’ elansondo.
Sozidlel’ esilahleni sezitshone phansi
Khonale koMakokoba.
Izikhuleko zikhulek’ emunjini nje
Solukhonale koMakokoba ucingo.
Inkuni lezigodo zombhelo-
Khonale koMakokoba.
Bayez’ abafana bomkute
Bevela khonale koMakokoba.
Emakethe yisiphithiphithi
Athengiswa ngamasaka losakazana
Samahlamv’ iyawa’ imali
Bathi vele yon’ iyisithutha
Ibanjwe ngumqando bayayibutha
EyeMelik’ ichithiwe, bayayithutha
Othi leyo kayikho yisithutha,
Le kayiding’ iSandawana vuka!
Kasikh’ esiphandel’ esinye
Ehamba muva ibanjwa yizinja.
Elokitshini ngeKango batsheba kathathu
Liliny’ intaba yesitshwala ngumfana
Emphinjen’ ayageleza nguntshelelezane
Lamponjwana eMaDlodlo leManor.
OBafana, oGreenhorse laboKhanda,
Zintombi zomhlanhlandlela bayathuthumela
Bayalinqolong’ igolid’ elimnyam’ eBotswana
Azaphenduk’ esinsithek’ amabhasi,
Okomamazal’ evela komkhwenyana
Ngamazhing zhong amaTshayina
Kuthengwe kube ngu ‘lami ngilakho’.
Intethe zehlile lamabhel’ emaphandleni.
Bayakhothama ngaw’ amacimbi
Sebengamalub’ ehlobo awu!
Ngecimbi bayizikhwicamfundo.
Ngecimb’ imikul’ igcwele.
Ngecimb’ izisu ziyibucwazicwazi.
Ngecimbi zidlan’ uboy’ esibayeni.
Ngecimb’ emzimbeni bahloniphile.
Izithelo zemvelo ngezethu sonke.
Asizilondolozeni thina sonke.
Kungumlandu wethu sonke.
Ngenhlakanipho sinothe sonke.
Sithuthukis’ isizwe sethu sonke.
Imithetho yemvelo yenzelwe thina sonke,
Ukuz’ umhlab’ ungatshabalali.
Mpumelelo Ncube
Hleziphi Winnet Dube
Awu ngiyababona ngempela
Besenz’ umona bethi bayabona
Bethi njengabantu bakhona
Benz’ izinto zakhona ngesikhathi
sakhona
Beqa bejanqula bedlalis’ inqulu
benqunu.
Bazithenga, bazithunqise zibasanganis’
insangu,
Nkazana, Mfana khangela phambili.
Mfana, Nkazana ngiyababon’ abangiboni,
Sebedlal’ ingqobe zabadal’ endleleni,
egcekeni, emehlweni,
Bathi kabasimaqaba bona bayinqaba,
Buqamama ngabaqabujanayo qabu emini
libalele,
Khonapho ngabathandeleneyo thande
babamunye libalele,
Amacansi yiwo amavuzuvuzu akhona,
Izintomb’ ubuntombi buvuzel’ emavuzwini,
Amajah’ ubujaha buqale evuzwini,
Nkazana, Mfana khangela phambili.
Ungakhangwa
ngamakhekhe lamakhumkhum’
Akhithik’
imikhakha yensangu
Ungakhangwa
ngamawisikhi lamawoso lamavosho,
Ungakhangwa ngamacans’ uzacikizek’
ucake sacigo,
Nkazana, Mfana khangela phambili.
Bathi zimbanje zamanje,
Uzibhema manje udakwe manje,
Bathi ziyabahlakaniphisa
Kanti ziyabanhlanhlathekisa
Mfana, Nkazana khangela phambili
Onesimo Ngcotsha
Mpofu
SOMILE
Imithombo seyaphusa
Nanto lezulu liphunza
Safa sithwebuza
ngempunza
Uzul' elekhangelelo
labozisa
Wayacel' izul' uMpala
Inyawo zabuya
zihitshwa luthuli
Wathandaz' uMpunzi
Waze waphum'
impabang' emadolwen' okwembuzi
Kodwa phinde!
Sahamb' ulimi phandle
Okwechalah'
elijakadiswe yimpunzana
Imithunzi yasithunuka
Izihotsha zasihotsh'
amandla
Imihome yasihoza
Imbalu zabal' amabal'
engwe
Pho sicatshephi na?
Safa yikoma!
Umdumo siwuzwile
Amayez' amnyama
siwabonile
Isibhakabhak'
asembesile
Insingiz' emnyam'
entaben' ikhalile
Ithemba livukile
Lekhangelelo libuyile
Inhlanyelo
siyicacadile
Izikeyi sizibazile
Amajogwe
siwalungisile
Kodwa somile!
Umkhosi siwuzwile
Inkomo ziphelile
Ingcuba siyivungulile
Obabhemi bafile
KuSomandla sicelile
Nxa kuyizenzo zethu
sixolele Baba sonile
Sizwele ngoba
sesizwile
Zwel' umhlaba wakh'
uwusindise
Abantu bakh'
ubaphilise
Baba yebo sonile
Kodwa somile.
Onesimo Ngcotsha
Mpofu
Nkosilamandla Kunene
ZINOFOBHIYA
Sizwe sikaNdaba,
Lina besilo,
Ondlela zimhlophe,
Sizukulwane
sikamkhulu,
Akelingisize bo,
Nans' impican'
ingiphicaphica.
Angiluzwisisi lol'
udaba,
Imibuzo kim'
ilitshebetshebe
Kodwa zon' impendulo
zinwele zethendele,
Nanko phela bengithi
ngidl' amathamb' engqondo,
Ngaqabuka
sengiwakhukhuza,
Kuthiw' okwehlul'
amadoda kuyabikwa.
Ngalulekani bo
ngiyacela,
Kamb'
ubudlwangudlwangu ngobani?
Umsindo wonke lo
ngowani?
Yibubudlubudlu
bokulwa,
Ukuthula kuyisibhono
sentwala,
Inhlalakahle ngoxolo
zimpande zedwala.
Buyeph' Ubuntu
kumuntu?
Nanko phel' umunt'
uhlinz' umunt' okwembuz' ebiweyo.
Aw' ibunzi selize
libuthakathaka, ngenxa yokuzibuz' ukuthi,
Kanti yimbewu bani le
esihlanyelw' ensimini ye-Africa?
Yon' ivel' ihlanyelwe
ngubani?
Kaz' umoya
wokumanyana njengabamnyam' uphungwe ngubani?
Ngubani? Ngubani?
Awu ngubani low'
ongene losiba lwethendel' emuzini we-Africa,
Waxega yon' inzalo
ye-Africa?
Awu ngalulekani bo,
Kuvela kuphi lokh'
engikuzwayo?
Umunt' angath’
eyinzalo ye-Africa,
Ayekuth' omuny'
owe-Africa yisethekeli,
Kukanti bobabili
bese-Africa, beyinzalo ye-Africa?
Kaz' umoya wokumanyana
njengabamnyam' uphungwe ngubani?
Zul' omuhle,
Funa yim' engibuz'
umbuz' ongabuzwayo,
Kodwa nank' omuny'
osungicuye wangicuy' umcabango,
Kanti lelo zinyo
likaFobhiya
Likhumuke lakhithika
ladojwa ngubani wangaphi?
Nanko phela
sokuyinsumansumane,
Njengob' inkemenkem'
ilithonsi!
Ngalulekani bo
angiqedisisi;
Ukuthi kambe
sebeqedene
Ngabakabani lab'
abahlinzwayo?
Inhliziy' ibuhlungu,
Buka phela
ngisiqhinqil' esika Nand' isililo,
Kwaze kwaya kwathint'
esikamam' isihelo,
Kodw' akusizanga
lutho!
Pho sikhulumeni,
singakhulum' ini?
Pho senzeni, singenz'
ini?
Nans' ingqobe
Hlabezulu,
Buqedwa buthiweni
lobu budlwangudlwangu?
Njengoba
kuyibubudlubudlu bokulwa.
Kaz' umoya
wokumanyana njengabamnyam' uphungwe ngubani?
Ngiqinisile
ngiqinisile;
"Inzalo y-eAfrika
kayisoz’ ibeyizethekel’ e-Afrika!"
Nkosilamandla Kunene
UMUSA WANSUKU ZONKE
Lalela Ukulaya KweNkosi
USolomoni, inkosi yakoJuda yananzelela ukuthi ubuntu
lesimilo somuntu kusuka ekunqandweni lekulayeni komzali, umuntu esesemncinyane.
Encwadini ayilobayo eyeZaga, kulezahluko ezithile ezisifundisayo ngokulaya
langokulaywa. Uthi kumlungele umntwana ukuthi alaywe ngoswazi. Kuyindlela
yokumqondisa lanxa ezakuzwa ubuhlungu. Ebusweni bukaNkulunkulu, singabantwana,
njalo sihamba silahleke ezindleleni zethu zempilo njengabantwana bonke.
Ukulahleka endleleni kutsho ukweqa umlayo oyabe uwutsheliwe, kumbe ukwenza
lokho okuthiwe ungakwenzi. Kwesinye isikhathi ingqondo iyembeswa yibulembu
bobuthutha umuntu angabe esananzelela ukuthi wenza okufanelelyo kumbe hatshi.
Uba umuntu angaqhubeka ngalezi zindlela, loba esephendukela eNkosini, ucina
elahlekile kuze kumfikise ekulahlweni yiNkosi, asuswe entandweni yayo.
Uba umuntu engena engozini, esilingweni, ekulahlweni licala,
kumbe okunye okuzwisa ubuhlungu, kumele azihlole. Imvama, sandise ukuthi
sizigeze sizibeke ebuhleni besesisithi lokho okwenzakeleyo kuyimihlola. Bonke
abakholwayo uNkulunkulu ubaphatha njengabantwana. Uma ebona umntanakhe
ephambuka eqinisweni uyamkhuza, amlaye. Njengomzali wonke indlela zokulaya
zikuye. Ezinye zibuhlungu. Kodwa zwana okukhulunywa nguJobe 5:17-19; uthi ukulaya
kukaNkulunkulu kulungile ngoba yena ulimaza abuye abophe amanxeba, atshaye
abuye apholise ubusukhululeka enhluphekweni. Kungoba phela nxa usizwa
ubuhlungu ubusuphenduka uyekele okubi, ubuya akubusise njalo. Kuhle-ke sivume
uma silaywa, singasoli, kodwa siphenduke.
Umzali
wonke uthokoza ngomntwana okhuzekayo lovuma ukulaywa. Omunye umbhalo uthi, “Ndodana
yami, ungeyisi ukulaya kweNkosi. Njalo ungalahli ithemba lapho ikukhuza ngoba
iNkosi ilaya labo ebathandayo, ijezise wonke emamukela njengendodana”
(amaHebheru 12:6).
Uma uvuma
ukulaya kukaNkulunkulu, uzisole, uzathokoza ngawe akwenzele okuhle empilweni
yakho. Xwaya izeluleko zeNkosi yona izathinta ububi obukuzingelayo.
Barbara Nkala
***
Okwalanhla
kwanele Mthwakaz’ omuhle! Siyafisa ukuzwa kuwe ukuthi isigcawu lesi sikuthinta
ngandlela bani. Siyalangatha ukuzwa ukuthi eyakho imibono ithini ngoba ulawo
umcabango ongasisiza ngawo. Siyanxusa. Asibeni selimeni lokukhuthaza
lokuphakamisa ulimi lwethu. Hlaba eyakho indima ngo2020 uyiphutshe.
Ukhumbule
phela ukuthi esalela muva ithiwa xhaka yizinja.
Ngiyalithanda, njalo ngiyabonga!
Gogo Nkala
No comments:
Post a Comment