Gogo Nkala
Hawu, asengimangele ukuthi sesingene kunyanga
yesificamibili emnyakeni! Hawu bo, sesinukelwa yiKhisimusi. Ngubani owayesazi
ukuba unyaka wonalo ka2019 sizatotoba kuwo uze uphose uphutshe? Kunzima kulumela
kunje emhlabeni lo uhlabayo! Ulithemba lamathemba lo esimthembayo!
Nangu njalo
lamhla uDr Eventhough Ndlovu esilethela amasu amqoka embongi ezisacathula
lesezizenzele igama. Siyathemba amasu la uyawetshisa ukuze akusize ekulobeni
kwakho ucine lawe usuyingcwethi yoqobo, mhlawumbe eyodumo.
AMASU AMQOKA
EMBONGI EZISACATHULA LESEZIZENZELE IGAMA
Dr Eventhough Ndlovu
Sesihlangane
njalo kuhlandla lesithathu lapho engifisa ukuthi ngichaye sobala amaphutha
enziwa zimbongi zalamuhla ekulobeni kwazo. Injongo yokwenza lokhu yikuthi
silimukisane ngala amaphutha ukuze siwaxwaye ekulobeni kwethu. La ngamaphutha
engiphawula ngeyame embonweni yezingcitshi ezihluza imibhalo yokuzibumbela
sikhangelane lalokho okukhangelelwe kuzimbongi ezizipha umlandu wokubhalela
uzulu.
Iphutha
lakuqala engilibona emsebenzini yembongi zalamuhla ngelokuthi inengi lazo
alisawazi sibili umlandu wazo. Ekulobeni kwembongi ezinengi, kuvela sobala
ukuthi indaba emqoka yomsebenzi wembongi awusaziwa ngoba izinto ziyonakala,
kodwa zikhona imbongi ezilomlandu endabeni zokubusa kwesizwe lenhlalakahle
kazulu. Imbongi zalamuhla azisalimmeli iqiniso. Sezidume ngokuthatha icele.
Sezawudela umkhuba wezolo wokukhuza lokhalimela otshaya ibatha lezigwenxa
ekuhambeni lekwenzeni.
Imbongi
zalamuhla sezawudela umlandu wazo wokuba ngumlomo, ilihlo, lendlebe zikazulu
kanye lezababusi ngendlela eyiyo. Inengi lembongi ezibhala ngezombusazwe
sezaphenduka zaba ngabahayi abakhuza
amakhosi, bewenza engathi angamasoka angelazo izici.
Ziyalifihla
lezizimbongi iqiniso, zikhohlisa uzulu, ziloba imbali engaqondanga okuyinto
engalethi ingqubelaphambili lokubambana. Ukungaphathi kuhle iqiniso kwenza
abantu bahlale bethukuzelane induku emlotheni. Kwenza kubenzima ukuthi abantu
bakhumisane umlotha lokuthi bagezelane amanxeba, babhodle, kuxolelwane kuyiwe
phambili ngokubambana lokuthula. Imbongi ezinengi ezakhetha ukubhala
ngezehlakalo ezibucayi eziphawula imbali yethu zidunga iqiniso zilivoxe
zilibeke ngendlela eveza sobala ukuthi zibhalela ukuthi zitshengise inkonzo
yazo kulabo ababusayo ngaleso isikhathi.
Ngithanda
njalo ukuthi sihluze ngelihlo lokhozi njalo elibukhali inkondlo ezikuqoqo Isidlodlo sikaMthwakazi eziphatha udaba
lwempi yenkululeko lenkululeko ngokwayo. Imbongi ezilenkondlo kuleli iqoqo
zethula impi yenkululeko kungathi yaba ngumthwalo olula nje kwabasundu ukuthi
banqobe abamhlophe, kodwa siyazi ukuthi kwakungelula. Banengi abafayo kwelethu
icele, njalo abethu babeke bakhulelwe sibili kube kubi. Okunye ezikuphosisayo
yikuthi zenza engathi impi yalwiwa ngabalweli benkululeko kuphela, njalo
abeselisa kuphela. Kodwa eqinisweni, siyazi ukuthi uzulu labesifazana labo
bayilwa ngeyabo indlela impi njalo yibo ababephakathi kwelitshe lembokodo.
Kusobala
ukuthi inengi lembongi lezi azilimmeli iqiniso. Ngokwenza lokhu, zehluleka
ukufeza umsebenzi wazo wokuba ngumthombo loba isiphala sembali yesizwe. Indlela
izehlakalo lezi ezethulwe ngayo yenza obalayo angalitholi iqiniso eliyilo
sibili ngembali yesizwe sethu.
Ngalokho-ke,
nginxusa ukuthi kesiziphe isikhathi kuleli iviki sifunde amaqoqo la sizibonele
ngawethu engikusolayo ukuze sikuxwaye ekulobeni kwethu.
Asihlanganeni
esigabeni esilandelayo lapho engizaqhubeka khona ngixoxa ngamanye amaphutha
avame ukwenziwa zimbongi ekulobeni kwazo. Ngizagxila emaphutheni okusebenzisa
ulimi.
Umlobi nguDr Eventhough Ndlovu ongumbalisi lomkhulu
weDepartment of African Languages and Literature e-University yeZimbabwe.
GIYA
MBONGI KAMTHWAKAZI
Lamhlanje silembong entsha, intombi eqeqetsha eNUST,
uSisanda Ncube, ekhuza esithi, Sono Sitha SikaThixo. Asigiye layo imbongi kaMthwakazi!
Sisanda Ncube
Sono Sitha Sikathixo
Kuyinsindabaphenduli kugabha ingqondo
Zizamile izazi, bazama abephul’
amapenseli
Khepha kwalile ukuhlungula imvelaphi
lesisusa sakho Sono
Bazamile ngobungcwethi lobungqongqotshe
bomhlaba
Kodwa ngeke kufumaneke umsuka wakho Sono
Sono sitha sikaThixo, umubi uyesabeka
Ebungcweleni obukhona ezulwini kulapho
wavela khona yebo?
Kuyadida ukuthi unga wavela njani
endaweni ethobe kangaka
Bheka uThixo ekudaleni kwakhe umuntu
wamenza wafana laye
Kodwa ngenxa yakho Sono umuntu
ugugudekile waguga
Maye Sono, sitha sikayise woluntu
Sono umubi sitha sikaThixo
Ekungeneni kwakho Sono uluntu lubhekane
lemikhuhlane lokufa
Zisele intandane
Basele abafelwa labafelwakazi ngenxa
yakho Sono
UThixo ubemdalile umuntu ukuba abe
lempilakahle lenjabulo
Khepha konke lokh’ usukukhukhule Sono
Awu Sono, umubi uyesabeka
Balele emathaleni abenkosi behluleka
lokuvula umlomo
Abanye behluleka lasibi sokuvuka ngenxa
yemikhuhlane
Konke kungenxa yakho Sono
UThixo ubemdalile umuntu wamupha
inhliziyo ethambileyo
Ekwaziyo ukugobela intando yakhe
Weza wena mashushu waba sengqondweni
yomuntu
Waphenduka waba nguntando kayiphikiswa
Umpondo kayintshintshwa
Umuntu kasakwazi ukuthobela uMdali wakhe
ngenxa yakho
Bheka ubehlukanisile ubuso bukaThixo
lobomuntu
Maye Sono, sitha sikaThixo!
Tokolo themba amathunzi ayemuka
Akusensuku zatshwala Sono uzatshabalaliswa
Impilakahle lentokozo kuzabuyiselwa
Uyeza uThixo uzakuqeda du!
Phinde kubekhona ukuhlupheka
Phinde sikubone ukugula
Sono sitha sikaThixo, zibaliwe ezakho!
Sisanda Ncube
UMUSA WANSUKU ZONKE
UJesu
Uyeza
Kulengoma
esiyihlabela ngomfutho, sigide, siqakeze izandla. Ithi yona, “UJesu uyeza! Sithi, ‘Amen, Aleluya!’ ”
Aqhubeke okhalelayo anqolonge athi, “Sombona
sijabule! Sombona sithokoze!” Abanengi siyabe sivumela sisithi, “Sithi, ‘Amen, Aleluya!”
Liqiniso.
UJesu uyeza. INcwadi itsho njalo. Ayithandabuzi. Ayiqambi manga! Kodwa, kambe
sizambona sijabule sithokoze ngeqiniso? Sonke? Umhlaba wonke jikelele? Awu,
kungakuhle nxa kungaba njalo! Kodwa iNcwadi sengathi iyabalisa ngabazambona
bajabule. Kwabanye ukuza kwakhe sengathi kuzaletha ukuthuthumela lokugedla
kwamazinyo.
KuMathewu
25:1-13, siphiwa umfanekiso wokuzilungiselela ukubona uJesu, uMyeni ozayo,
ozakuzathatha uMakoti wakhe olibandla lakhe. Siyatshelwa kulo umzekeliso
ngezintombi ezilitshumi ezazilinde umyeni wazo, kodwa zingakwazi ukuthi uzafika
nini. Kuthiwa ezinhlanu zazihlakaniphile, zalungisa konke ukuze zamukele
umyeni. Kodwa lezi ezinye ezinhlanu zaziyiziwula. Zachitha isikhathi ezintweni
ezingelamsebenzi, kanti isikhathi siyahamba. Ikanti zonke zazingalwazi usuku
lesikhathi sokufika koMyeni.
Zilibele,
zezwa nango uMyeni, usefikile. Ezihlakaniphileyo zazihlezi ziqaphile,
zilindele. Lezi eziyiziwula zajumeka. Zazikhohliwe ziphakathi kokukholisa
okwemhlabeni okungapheliyo. Zacina ziphithizela, zitatazela, ithuba seledlule.
Azimbonanga umyeni. Azimamukelanga. Zavalelwa phandle. Zakhala, zicela
ukuvulelwa. Kodwa, kwakungasasizi. Zazidlalise ithuba lokulungiselela
lisekhona, uMyeni engakafiki.
UJesu
uyeza sihlobo sami. Lokhu kuliqiniso elimiyo, eliphelelyo. KuJohane 14:2,
uyathembisa uJesu ukubana uya ezulwini
ukusilungiselela indawo. Uqhubeka athi, “Nxa
sengiyile ukulilungiselela indawo ngizabuya ngizolithatha ukuthi libe lami ,
ukuze libe khona lapho engikhona.”
KuMsebenzi
YabaPhostoli 1:11, abafundi bakaJesu babemjolozele esenyuka esiya ezulwini.
Amadoda amabili afika kubo athi, “Madoda
aseGalile, limeleni lapha lijolozele esibhakabhakeni na?Yena lo uJesu
osethethwe kini wasiwa ezulwini uzabuya ngayonale indlela elimbone esiya ngayo
ezulwini.”
UJesu
uyeza. Siyaxwayiswa-ke ukuthi sihlale sizilungiselele. INcwadi kuMathewu 25:13
ithi, “Ngakho lindani ngokuba kalilwazi
usuku loba isikhathi.”
Izintombi
ezinhlanu ezihlakaniphileyo, zathokoza zimamukela uMyeni. Wena-ke sihlobo sami?
Angafika khathesi nje, loba nini, ulibele, ulakho na ukumamukela ngenjabulo?
Ukhululekile na ukumbona esiza? Kuyini ongakakulungiseli kahle? Lungisa khona
manje sihlobo, Isikhathi sifutshane.
OGwalweni
lweSambulelo isahluko 22, uyazitsholo yena uJesu ukuba uyeza. Ukutsho aze
aphinde kathathu esahlukweni. Uthi, “Khangelani
ngiyeza masinyane!”
Umlobi
uyagcizelela amazwi kaJesu evesini lamatshumi amabili, athi “Yebo, ngiyeza masinyane.” Ameni. Woza,
Nkosi Jesu.
Ake
uzihlole sihlobo sami. Uwagcinile na amazwi esiphrofetho alotshiweyo eMbhalweni
akhuluma ngokuthi olungileyo kaqhubeke enze ukulunga, longcwele kaqhubeke
engcwele. Uwulindile na umvuzo wakho, njalo lenhliziyo yakho ihlanziwe na
ngegazi lakhe? Zilungiselele, ngoba uJesu uyeza.
Asithandaze:
Nkulunkulu wami,
ake ungisize ngihlale ngilungele ukuza kukaJesu. Ngisiza ngingalibali
ngokomhlaba, kodwa ngitholakale ngilungele izulu.
Barbara
Nkala
STORIES OF FAITH
Ndabenhle Zibusiso Nkala
My
Stone Pillar
Times are hard! Many
people cannot make ends meet. Unemployment is unprecedented. Those who go to
work do not earn enough. The prices of fuel and basic commodities soar every
day. This economic meltdown in 2019 is reminiscent of what occurred in
2007/2008. I never dreamt the events of those years would visit us again so
soon. The only consolation I have as I face each day with confidence is my
stone pillar.
In
the book of Joshua 4, we witness the Israelite nation crossing the Jordan. The
Lord said to Joshua, “Choose twelve men from among the people, one from each
tribe, and tell them to take up twelve stones from the middle of the Jordan,
from right where the priests are standing, and carry them over with you and put
them down at the place where you stay tonight” Joshua 4:2,3. The stones
were to be a memorial to the people of Israel forever; a reminder of the
miracle of crossing the river Jordan on dry ground.
God’s
faithfulness cannot be doubted, though at times when we are in a nasty
situation, or troubled, it is difficult to remember that God who has done it
for us before can do it again. So, even as things are tough, I like to remind
myself and family of God’s faithfulness in the past. He can do the miracle
again and we shall survive.
I
can never forget the hand of God and how my faith was stirred up in 2008 in
Harare, Zimbabwe. The country was going through a turbulent time with no goods
in the shops, unprecedented hyper-inflation, and daily if not hourly price
increases. It was in this environment that our telecommunications business was trying
to survive the economic storm. Part of that survival quest meant trying to
preserve a customer database with ever evolving needs, as they also tried to
maintain and remain in business.
During
that time, to get a new business order was very rare, let alone acquiring a
significant chunk of business project. But, by God's grace, one huge customer
requirement landed on us, and while there was major excitement at this sizable
order, there was also a lot of trepidation as I knew we did not have the
material required to fill the order. Normally, we would have needed to import
the raw material, but in this Zimbabwe, foreign currency was a rare commodity,
and only available in the black market at a premium! Our normal supplier in
South Africa was weary of the Zimbabwe Situation and so, was not willing to
risk any supply arrangement without money up front. While our God-sent customer
had committed to the order and put down a significant deposit, they would only
finish payment on delivery.
I
vividly remember agonizing over the situation, then I said a prayer of
surrender, “Lord, you gave us this business, and I am trusting you to enable us
to deliver timeously.” After that, I put on an attitude of prayerfulness and
belief. I banished any needling doubts, giving no room to fear or failure. I
believed God gave the opportunity and as such he must know how we would
deliver.
God's
hand was not slow to act. It was out of the blue that within a few days, a
local supplier that we worked with from time to time said they had material
available that one of their huge customers had rejected as it was the wrong
product. “Would you like to buy this material from us? It just will be too
expensive to send it back to the supplier.” Did I hear right? The material we
needed was right here, at our doorstep! To crown it all, the supplier was
willing to accept payment in local currency, and the cherry on the cake was
they would give us conducive payment terms. This was nothing short of a
miracle.
God
has moved in my life before, a lot of times, and continues to. But this was the
most vivid and crystal-clear miracle after a prayer of surrender and faith I
had ever experienced. Suffice to say, I was ecstatic and overwhelmed at the
same time. In tough times, I look back and remember God’s faithfulness, and so
believe that he can do it again. It is inspiring and encouraging to read
testimonies, but it is even better to live out one for yourself. It really is
amazing and powerful to see God at work in one’s own life. That moment has
become my stone pillar.
Ndabenhle
Zibusiso Nkala is married to Tendayi and they have three precious children. He
is the Access Network Manager at Telco.
***
Limqotho elithi ukufunda
akupheli! Isibili kuzaphela mhla umhlaba lo uphelayo lawo. Ngakho, sisaphila,
asifundeni kwabanye, sicotshe empilweni lokho okusisizayo, okusiphakamisayo,
okusakhayo, okusibusisayo! Mina lezizinkondlo uMthwakazi agiya ngazo, lamazwi
oMbhalo abonisa umusa weNkosi wansukuzonke, lezindaba zokholo lezi ezitshengisa
uthando lokwethembeka kukaNkulunkulu lokusebenza kwakhe ezimpilweni zethu
ngendlela eyisimanga, ziyangibusisa kakhulu. Ziphakamisa umphefumulo wami. Zingenza ngibe ngumuntu ongcono insuku zonke.
Wena olesiphiwo
sokuloba, dobha usiba lwakho ulobe. Qoqoda umtshina wakho sizwe ukuthi eyakho
imicabango lemizwa kusifundisani. Kusikholisisa ngandlela
bani. Ungakhohlwa, esalela muva ithiwa xhaka yizinja!
Asihlanganeni njalo kuviki
elizayo.
Ngiyalithanda, njalo
ngiyabonga!
Gogo Nkala
No comments:
Post a Comment