Gogo Nkala Newsletter No 16

Ekuhle Mthwakaz’ omuhle!

Kambe linjani bathandekayo. Isikhudumezi lesi esikhona bantu beNkosi! Sibi kakhulu. Zamani ukunatha amanzi amanengi ahlambulukileyo. Njalo nxa lihamba phandle loba lisebenza phandle ligqoke izingowane ezivikela ilanga. Liyingozi lelilanga. Zivikeleni kulolulaka Mthwakaz’ omuhle. Njalo asiceleni eNkosini ukuthi isiphe amanzi. Komile. Lugwadule. Indlala ibhahile. Siyawakhalela amazolo.

Kuviki leli esichaphe kulo, sizwe imikhankaso emangalisayo mayelana lomkhosi wokuthi   abantu babuthane, batshaye ubhoko besiya enkundleni enkulu yemidlalo; betshengisela ngokuthi kukhitshwe amasankishini … izijeziso lezi esizwa ngazo kumalungelo abathile abangasavunyelwa ukuya kumazwe athile. Lusuke lwaqakatheka lolu suku kwaze kwadalwa usuku lwekhefu ukuze abantu bangavukeli emsebenzini, Labantwana abayanga ezikolo ukuze umkhosi ubemkhulu uzulu ebekelela esiya enkundleni enkulu eHarare lapho uMongameli welizwe ubezakhuluma khona labantu ngaloludaba. Asazi-ke ukuthi kube lomphumela bani? Kodwa uzulu uthini ngalokho?

GIYA MBONGI KAMTHWAKAZI

Banengi-ke abaxoxa ngaloludaba lwamasankishini. Ake sizwe ukuthi imbongi le yona ithini? Wena ucabangani ngalendaba? Uthini?

KAWESULWE AMASANKISHINI!

Uthini naNdodana?

Ngith’asihambe makhelwana.

Siyengaphi?

Khonal’ esigodlweni.

Siyekwenzani naNdo?

Awuzwanga kanti?

Ukuthini?

Uzaswela umsila njengembila wena

Ngoba?

Kuyadliwa mngane wami.

Kudliwani makhelwana?

Amaqath’ amabili enkukhu,

Amabili makhelwana!

Yebo na?

Lamatshiphisi. Ibhokisi lamafehlefehle?

Uzathengelwa ngubani NaNdo?

Thina asisakwazi ukudla lokho.

Zinkokheli zethu, hawu! Zimemile

Awuwuzwanga umkhankaso kanti?

Awuboni izikolo zivaliwe,

Lemisebenzini likhefu kusasa

Wonke amabombo, tekele!

Enkundleni enkulu esigodlweni!

Sithi, kawesulwe amasankishini!

Kodwa uNaNene uthe kumotshwa isikhathi

Uthe uzatshona ethunga,

Ulewoda emele ihambe ngoMgqibelo.

Kusamele ababhadale izimali zomntwana esikolo.

LoSekaNcuncu uthi yibuzanka lobulema

Uthi bafuqwa yibugovu lobuhwaba,

Ngithi ngamanga aluhlaza lawo,

Yikungazwisisi lokho.

Abakhulu bathe kumele sitshengise ukubambana

Kumele amazwe onke abone ukuthi

Amasankishini asiwafuni thina.

Mina ngiyathaba okunye

Kuthiwe sizaholiswa lamakawuso.

Mina ngifuna ukuba phambili

Mhlawumbe ngizazuzela loSekaDade ikawuso

Leyana enye yamsiza kakhulu emasimini.

Futhi ngithaba ngoba sizagada imota mahala

Simatshe sihlabelela sisiya enkundleni,

Kusamele uThirampu lowo

Losapho lwakhe oluhlezi luhuquluza,

Babone ukuthi amasankishini abo la asiwafuni

Yiwo asihlukuluzayo phela.

Khangela ezitolo yonke into iyadula

Ngamasankishini abo lawo.

Imota zihlezi zifolele amafutha

Ikanti azisagadeki, ziyabiza qho!

Imithi ayikho ezibhedlela

Mina ngifelwe nguBabomncane sibili

Ngoba kungelaDokotela ongam-opharetha.

Ngamasankishini!

Khangela ababalisi ezikolo

Bathi sebezafundisa beseqisa amalanga

Insuku ezimbili zwi evikini?

Qotho badlala ngabantwabethu!

Amanzi mhla ekhona yingcekeza yodwa

Anuka phu sengathi yisambuzi esinganakekelwayo.

Mina ngiyabathanda abakhulu bethu sibili,

Bayakubona ukuhawula kwethu

Bathembise ukusigebhela izibhorane

Amasankishini yiwo nta asehluphile

Abakhulu bayazama sibili.

Kodwa imeku zabantu baphetsheya lezi

Yizo ezisibonisa izibunu zenyoka.

Asihambeni sibili siyetshengisela

Akhawule uThirampu lembudlwana zakhe.

Sebelokhu bevalela abakhokheli bethu

Ukuya emazweni bayesitholela usizo

Howu, bantu bakithi!

Kawesulwe amasankishini abo la!

Kade asihlukuluza kusabusa umuyi

Lalamhla yisoleso!

Hatshi, asihambeni sibili.

Asazi wena othathela muva naNdodana

Mina sengisiya gada sibili

Phansi lama sankishini aloyayo!

Kawesulwe amasankishini!

Sibuko Mthunzi

Lamhla zimbili imbongi ezigiya kulesisigcawu. Nansi njalo intombi yethu uSisanda Ncube yona eqeqesha eNational University of Science & Technology, kuhlangothi lwePublishing. Ilaya ilimukisa ngokuphela kwesikhathi. Ake uthathe ithuba uzwisise ukuthi indikimba yendaba aphezu kwayo iyini.

Sisanda Ncube

SIPHELIL' ISIKHATHI

Nampa bayenda bayendiselana

Ziyanda izimuli,

Abazukulu lezizukulwane

Abagqize qhakala abeNkosi

Yintokozo kuphela;

Khepha!

Siphelil' isikhathi.

Sansakavukela umchilo wesidwaba,

Bavuk’ izilwane obaba ekhaya

Omama bavuka balale ngenduku

Ngakolunye uhlangothi

Obaba bavuka balale ngezigidi zezinhlamba

Kodwa,

Siphelil' isikhathi.

Jeqe, ngakolunye uhlangothi

Bayalila ziquma umbomb’ ubusuku bonke

Zisele intandane,

Basele abafelwa labafelwakazi

Labazali basele sengathi babezinyumba

Balel’ abeNkosi

Kakulantokoz’ ebusweni bomuntu

Khepha usizi lulotshiwe kuye

Siphelil' isikhathi.

Ngeke ukubon’ ukulala ngesibomvu ebantwini

Balal’ amathumbu esilwa esiswini

Ngoba kungekh’ okungenileyo

Yindlala leyo.

Pho, sophephelaphi beNkosi?

Siphelil' isikhathi.

Liyababhadl’ emini.

Ubatshaz’ umqand’ emin’ abeNkosi

Zitshabalel’ izindlu

Kusel’ indandalazi elingalalasihlahla

Uzamazamile umhlaba,

Amanz’ akhukhula konke

Siphelil' isikhathi.

Tokolo, themba amathunzi ayemuka

Siphela nje isikhathi kasingapheli lawe

Kukhomba oz’ ukuzoqeda izinhlupheko zonke

Ezokuphela kwesikhathi

Intokoz’ enkul’ iyeza

Qina mhlobo!

Akulahlwa mbeleko ngokufelwa

Siphelil' isikhathi,

Kasingapheli.

Sisanda Ncube

AMASU AMQOKA EMBONGI EZISACATHULA LESEZIZENZELE IGAMA

 

Dr Eventhough Ndlovu

Impawu Ezimqoka Ezikhangelwayo Nxa Kuhlaziywa Inkondlo

Sesihlangene njalo kuleliviki lapho esikhukhuza khona udaba lwempawu ezimqoka ezikhangelwayo nxa kuhlaziywa loba kucutshungulwa inkondlo. Kuqakathekile ukuthi njengembongi wazi ukuthi labo abazabala umsebenzi wakho kuyini abayabe bekukhangelele.

Kuviki edluleyo sikhangele uphawu lwakuqala, ulimi lwenkondlo. Ngaveza ukuthi, ekulobeni kwakho njengembongi, kuqakathekile ukuthi usebenzise ulimi oluqondileyo njalo oluyifaneleyo inkondlo yakho. Kumele ulobe ngesiNdebele esiqondileyo, uxwaye ukuhlambaza, uhloniphe njalo ugcwigcwize ungaze wathi bhadla okuzilayo.

Ngaveza njalo ngaqinisa ukuthi kumele inkondlo yakho uyihlobise njalo uyinonise ngolimi oluhlabusayo lolukhangayo. Ngagcizelela ukuthi lokhu ungakwenza ngokugabaza ngolimi usebenzisa incezu zenkulumo ezifana lezifenqo zenkulumo ezibalisa ihaba, isifaniso, ukubhuqa, isingathekiso, ukwenzasamuntu, isiqathaniso lenhlonipho. Ngengeza ngokuthi, lokhu ungakwenza njalo ngokusebenzisa imifanekiso lezenzukuthi eziphathisa ukwakha umfanekiso wengqondo walokho ophezu kwakho.

Kule iviki ngithanda ukuthi siqhubekele phambili sikhangele olunye uphawu olumqoka ekulobeni inkondlo. Nxa sicubungula loba sihlaziya inkondlo, siyakhangela njalo udaba lwayo. Abanye babiza udaba lwenkondlo ngokuthi yindikimba yayo loba ekumumetheyo kumbe ekuquketheyo. Ekulobeni kwakho njengembongi kumele ubone ukuthi inkondlo yakho iphezu kodaba oluthile, ilokuthile ekuquketheyo okuyikho lokho ofisa ukuthi ukudlulise kuzulu. Udaba lwenkondlo lungakhelwa kuloba yini, kodwa lokhu ngatsho ngaphambilini ukuthi imbongi ilomsebenzi omkhulu, ayiphongu loba ngaloba yini nje. Kumele kube khona okuthile osekuyiswelise ubuthongo, ezidla ngakho, efisa ukuthi ikubhodle njalo lokhu kumele kube yinto eyivusa usinga loba ugqozi lokuthi ilobe. Okuqukethwe yinkondlo kungaba ludaba olusematheni kazulu njalo okucelwana ngalo isawudo kuvukiswanwa lokutshoniswana ngalo.

Udaba lwenkondlo lungakhelwa ezehlakalweni zempilo ezenzakalayo loba ezedlulayo kumbe ezizayo ngoba imbongi ilelihlo lengqungqulu elibona okungeke kwabonwa kalulu ngolunengi. Esifundweni sami sakuqala ngaveza sobala ukuthi kwele-Afrika, ayikho indawo yembongi ephonguloba nje ngenjongo yokuzibhalela izikholisela nje. Imbongi ilomlandu omkhulu kuzulu, ngakho udaba lwenkondlo yayo kumele lube lomutsho kuzulu. Kunengi okwenzakalayo emhlabeni esiphila kuwo okumele imbongi zibhale ngakho. Lokhu kubalela inhlupho uzulu abhekane lazo ezibalela ukuguquka komumo womkhathi, inkohlakalo, indlala, inkethabetshabi, imikhuhlane esibhahile, izenzo ezimbi lezinhle lokunye okunenginengi.

Kuyadanisa ukuthi kulezi insuku zimbalwa imbongi ezibhalayo, kodwa njengozulu sigalule phakathi kwezinzima inhlupho ezidinga ukulungisiswa. Kulusizi ukuthi imbongi zisonge izandla kungathi konke kuhamba kuhle. Kunengi okumele sibhale ngakho, ngoba njengozulu siphakathi kwelitshe lembokodo ngenxa yenkohlakalo lokuguquka komumo womkhathi. Ngakwelinye icele, imikhuhlane efana le-AIDS layo isithintithe imbokodo yaqothula lesisekelo, yaphendula imizi eminengi yaba ngamanxiwa.

Kulokufuthelana ngaphakathi kwenzalo kaMthwakazi ngoba kulokuthukuzelana induku emlotheni okulokhu kukhona, okuveza sobala ukudingeka kokuthi kukhunyiswane umlotha kugezelwane amanxeba, kuxolelwane njalo abantu babhodle. Imbongi zilengxenye enkulu endabeni ezifana lalezi, kodwa okudanisayo lokudabukisayo yikuthi zisonge izandla azenzi lutho. Ziphika ngokuloba ngezinto ezingathunukiyo, ezipholileyo nje. Kunengi okwenzakalayo lapho esiphila khona okungabumba indikimba yezinkondlo zethu.

Ukwanda kwendaba ezisematheni kazulu leziswelisa uzulu ubuthongo kuveza sobala ukuthi kunengi esingakhela kukho udaba lwenkondlo zethu. Ngikhuluma ngisenzenje kulodaba lwezijeziso zomnotho, amasanctions ngolwangaphetsheya olukhanya lusematheni kazulu, kodwa kazikho imbongi esezibhale ngawo zasicacisela sibili ukuthi avele ayini? Avele akhona yini? Alempumela kubani langaphi? Kungumlandu wembongi ukulimukisa, ukufundisa lokuqondisa ngezindaba ezinje. Ngizwa ngifikelwa ngolukhulu usizi nxa imbongi zithule nje zingenzi lutho ngendaba ezifana lalezi. Zithini imbongi ezavuthisa indlela lomdango nxa zibona sithule nje singathathi indawo yethu empilweni?

Asehlukane ujulisa umcabango uzibuza ngokuthi kuyini sibili ongaqala ngakho obona kudinga ukuthi kukhangelisiswe, sikhangelane lalokho engikubalise ngaphezulu. Ngikutshiyela ingqobe yokuthi ulomlandu, ngoba umkhulu umsebenzi ophambi kwethu. Kuzaze kube nini sithule singathi asiboni ukuthi kulesikhala esidinga ukugcwaliswa? Asihlangane kuviki ezayo lapho esizaphatha khona olunye uphawu olumqoka lwenkondlo, injongo loba inhloso yembongi.

Umlobi nguDr Eventhough Ndlovu ongumbalisi lomkhulu weDepartment of African Languages and Literature e-University yeZimbabwe.

UMUSA WANSUKU ZONKE

Khala, INkosi Iyezwa

Umntwana ongakhaliyo ufela embelekweni. Okhalayo, unina uyamuzwa, loba umlizane wakhe. Omuzwayo umntwana uzama ukuqeda ubuhlungu, loba ukungahlaliseki, loba indlala eyabe isikhona. Isaga lesi sitsho ukuthi umuntu olohlupho uyakhala ngenxa yalo. Ukhala eqondise kulowo ongamsiza ukuba amkhuphule kulolohlupho. Angathulisa athi, lalo lolohlupho lwakhe lungamqeda du yena ethe zwi.

Kwakukuhle abantwana bako-Israyeli beseGibhithe ukudinga ukudla ngesikhathi uJosefa kaJakhobe engumphathi welizwe lonke. Banakwa, benzelwa kuhle ngenxa kaJosefa. Kodwa ngemva kweminyaka eminengi kakhulu, kwaba lenkosi entsha eyayingamazi uJosefa njalo ingelandaba lakho okuhle ayekwenzele ilizwe. Ngoba basebebanengi kakhulu, inkosi leyo yabadlisa imbuya ngoluthi. Babesetshenziswa ngochuku olwesabekayo. Babetshaya izitina lokuvoxa udaka, Babesenza leminye imisebenzi yemasimini. Bakhala ngaphansi kwalelijogwe elalinzima kakhulukazi. Kuthiwa uJehova wakuzwa ukukhala kwabo, wasekhumbula isivumelwano asenza lo-Abhrahama, lo-Isaka loJakhobe (vesi 24).

UNkulunkulu wayengabakhohlwanga abantwana bakhe. Wakhathazeka ngabo, wasethuma uMosi ukuba aye kuFaro eGibhithe, ayebakhupha ebugqilini balelolizwe.

Ulohlupho bani empilweni osolukuthwalise nzima? Kungaba yikuswela, ukugula loba ukugulelwa, ukufelwa, ukucindezelwa loba ukuhlutshwa yimimoya emibi. Ungalahli ithemba. Ukhona uNkulunkulu. Uluthando. Ulothando. Khala kuye. Cela kuye. Uyezwa ukukhala kwakho, kakhohlwanga. INkosi uDavida kwesinye sezihlabelelo zakhe uthi, “Ngamlindela ngesineke uJehova; waphendukela ngakimi wezwa ukukhala kwami” (iHubo 40:1). Kuthatha isineke lokubekezela ukuthi size sithole impendulo efaneleyo. Khala eNkosini, ungadinwa. Khala ngokwethemba. Qaphela ukuthi kawoni lawe ekuhluphekeni kwakho. INkosi ethembekileyo izakwenyula kulolohlupho.

Khala ukhangele eNkosini ezulwini, uJehova uyezwa.

Barbara Nkala

STORIES OF FAITH

Revelation 12:11 says: “They overcame him by the blood of the Lamb and by the word of their testimony; …”. When we tell testimonies of the Lord God’s power and saving grace on our lives, the devil slinks away tail between legs. So, let us share our amazing stories of God’s love in action and shame the evil one. 

We look forward to reading your own story of faith in the coming weeks. Your well-written story should be about 500 – 600 words. Send your story to: barbarankala@gmail.com. Selected stories will be compiled into an anthology of stories of faith.

Look out for the next story in the series next week!

 ***

Kwanele okwaleli iviki Mthwakaz’ omuhle. Yetshisa lokhu okufunde lamhlanje kulesi sigcawu. Kuthini empilweni yakho lakulabo obathandayo?

 Bala, wetshise, ucabange, ulobe lawe. Mkhulu lumsebenzi.

 Ungakhohlwa, esalela muva ithiwa xhaka yizinja! 

Asihlanganeni njalo kuviki elizayo.

Ngiyalithanda, njalo ngiyabonga!

Gogo Nkala